Vdes mamia llapjane Sanije Topanica, iu ndihmoi grave në lindje gjatë luftës
Ministrja Haxhiu: Në konsultim me Ambasadën, vizitën për në SHBA e kemi shtyrë për një datë më të përshtatshme
Ministrja e Drejtësisë, Albulena Haxhiu, ka reaguar pasi Ambasadori i Shteteve të Bashkuara të Amerikës në Kosovë, Jeffrey Hovenier, tha se s’është koha e duhur që ministrat kosovarë të udhëtojnë jashtë vendit, pasi në Kosovë ka krizë.
Përmes një postimi në Facebook, Haxhiu ka thënë se do të udhëtojë për në ShBA, por se vizita është shtyrë në konsultim me zyrtarët e Ambasadës së ShBA’së në Kosovë, shkruan Gazeta Online Reporteri.net.
Haxhiu ka deklaruar se raportimet se ju ka refuzuar viza janë të pavërteta, derisa ka thënë se datat e vizitës do të kumtohen më vonë.
“Sot pasdite jam takuar me zyrtarë të lartë të Ambasadës së SHBA-ve në Kosovë. Ndër të tjera, diskutuam edhe rreth ftesës së tyre për vizitë në SHBA. Marrë parasysh situatën aktuale politike në vend, bashkërisht kemi konsideruar se duhet ta shtyejmë për një datë më të përshtatshme vizitën. Lajmet se më është refuzuar viza dhe lajmet tjera lidhur me viziten, ndryshe nga ky shpjegim, nuk qëndrojnë pra janë të pavërteta. Vizita do të realizohet dhe për shkak të interesimit, datat do t’ua kumtojmë me kohë”, ka shkruar Haxhiu.
Ambasadori amerikan Jeffrey Hovenier në një bisedë me gazetarë, është përgjigjur në pyetjen nëse i është refuzuar viza për në SHBA ministres së Drejtësisë Albulena Haxhiu. Ai nuk ka dhënë përgjigje të drejtpërdrejtë, por ka thënë se nuk është koha që ministrat të udhëtojnë jashtë vendit, pasi kemi një krizë në Kosovë, dhe duhet angazhuar nga brenda që ajo të zgjidhet.
Hovenier duke u përgjigjur në pyetjen rreth vizës për ministren Haxhiu, ambasadori ka thënë se nuk e sheh të vështirë që një ministër të merr vizë për në SHBA, por tani sipas tij meqë jemi në këtë krizë pas ngjarjeve në veri, mbase nuk është koha më e duhur që ministrat të udhëtojnë për në SHBA për takime zyrtare.
“Kjo këtu është enigmatike. Janë dy çështje. Nuk shoh asnjë rrethanë në të cilën do të ishte e vështirë për qeverinë e ShBA’së të lëshonte vizë për një ministër të Qeverisë së Kosovës. S’mund të flas për rastet specifike ose individuale të vizave, por nuk jam në dijeni për ndonjë rrethanë ku një ministër i qeverisë nuk do të kualifikohej për marrjen e vizës për punë zyrtare”, ka thënë ambasadori Hovernier në një bisedë me disa gazetarë të pritur në Ambasadën Amerikane në Prishtinë, ku ka qenë i pranishëm edhe drejtori i gazetës online Reporteri.net, Bekim Kabashi.
Përveç ministres Haxhiu, ambasadori Hovenier, ka thënë se as ministrat tjerë nuk duhet të udhëtojnë për në SHBA, që krizat të trajtohen këtu, dhe thotë se këtë ua kanë komunikuar zyrtarëve të ndryshëm në qeveri.
“Është një çështje tjetër e ndarë prej kësaj nga udhëtimi për në ShBA për takime zyrtare. Ne aktualisht jemi në një krizë, dhe është pikëpamja jonë që, ne jemi tejet të përqendruar në këtë krizë, besojmë që edhe kjo qeveri është e përqendruar në këtë krizë, dhe mendojmë se nuk është koha mbase domosdoshmërisht më e duhura që ministrat të jenë duke udhëtuar për në ShBA për takime zyrtare duke e pasur parasysh krizën të cilën duhet trajtuar këtu. Dhe këtë po ua komunikojmë zyrtarëve të ndryshëm në qeveri”, ka thënë Hovenier.
