Banka Botërore ndihmon QKMF-në e Podujevës me pajisje mjekësore

Qendra Kryesore e Mjekësisë Familjare (QKMF) në Podujevë ka pranuar donacion nga Banka Botërore me pajisje të ndryshme mjekësore për nevoja të shërbimit emergjent. Vlera e këtyre pajisjeve është mbi 16 mijë euro.

Sipas drejtoreshës për Shëndetësi dhe Mirëqenie Sociale, Adelina Stublla, këto pajisje do të ndihmojnë që shërbimet emergjente të jenë sa më efikase.

“Drejtoresha Stublla në emër të Komunës së Podujevës e ka falënderuar Bankën Botërore për këtë donacion shumë të vlefshëm për QKMF-në, të cilat ndikojnë në përmirësimin e cilësisë dhe efikasitetit të shërbimeve mjekësore”, thuhet në njoftimin e Zyrës për media të Komunës së Podujevës.

Sipas njoftimit donacioni përfshinë EKG me monitor, defibrilator me monitor, defibrilator automatik i jashtëm AED, sistem i kompesionit të gjoksit, aspirator (dy copë), cilinder oksigjeni (dy copë), çantë për ambulancë, jakë lidhëse, çantë paramedike, çantë mjeku, batanije termike nga alumini, komplet i ndihmës së parë, barrelë lëvizëse transporti, barrelë për raste traumatike, barrelë kurrizore, dyshek me ajër, jakne evakuimi, karrige kardiologjike, batanije për mbrojtje nga zjarri, fikëse zjarri e shportë depozitimi.