Kapet pas dy muajsh i dyshuari për tentim vrasjen e 27-vjeçarit në shisha barin në Podujevë

Pas më shumë se dy muajsh në arrati, ka rënë në prangat e Policisë i dyshuari për tentim vrasjen që ndodhi më 6 gusht, në orët e mesnatës në Shisha Bar ‘Host’ te Parku i Qytetit në Podujevë dhe përfundoi me plagosjen e një 27-vjeçari, i cili u qëllua me armë zjarri.

Sinjali mëson ekskluzivisht se i dyshuari P. B, 29-vjeçar është arrestuar sot në Aeroportin Ndërkombëtar të Prishtinës “Adem Jashari”, ku pas verifikimit rezultoi se po kërkohej nga Policia.

Ai ishte shpallur në kërkim nga Policia, pasi kishte ikur posa gjuajti me armë zjarri dhe nuk ishte gjetur as në shtëpinë e tij kur ishte kërkuar, ndonëse të gjitha njësitet ishin aktivizuar për kapjen e tij.

Kujtojmë se i riu që u qëllua u dërgua në QKUK me gjakderdhje të madhe në njërën këmbë, ku u plagos me armë zjarri, me ç’rast i ishte nënshtruar një intervenimi.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.

Grabitje e armatosur në Podujevë