‘Eksperimenti’ i Përparim Ramës paralizon qytetin me mëngjes, kaos total në rrugët e Prishtinës

Testimi i tretë i shndërrimit të gjithë unazës qendrore në qarkore njëkahëshe për automjetet në Prishtinë, ka shkaktuar kolona të mëdha në rrugët e kryeqytetit, raporton Gazeta Sinjali.

Radhë të gjata të automjeteve e ankesa të qytetarëve janë parë që në orët e hershme të mëngjesit.

Sinjalizues të Sinjalit kanë bërë me dije se qarkullimi vështirë i kalueshëm nëpër rrugët e Prishtinës sot, u ka shkaktuar shumë telashe dhe vonesa në punë.

Ndryshe testimi do të zgjasë deri të dielën.

Qarkorja njëkahëshe gjatë këtyre ditëve do të jetë funksionale në drejtim të rrugëve:

Rruga “Agim Ramadani”që nga semaforët pranë ish-menzës së Studentëve e deri te rreth-rrotullimi prapa ndërtesës së Komunë

Rruga “UÇK” nga Parlamenti e deri te ish-Kino Rinia.

Rruga “Migjeni” deri te ndërtesa e ish-OSBE

Rruga “Luan Haradinaj” deri te semaforët pranë Bankës Qendrore

Rruga “Ukshin Hoti”

Rruga “Robert Doll”

Komuna e Prishtinës iu ka bërë thirrje qytetarëve që të kenë durim përgjatë kësaj periudhe provuese të ndryshimit të qarkullimit me automjete, meqenëse qëllimi kryesor i gjithë procesit është zgjidhja afatgjate e lirimit të hapësirave të lëvizjes për këmbësorë sipas rekomandimeve të task forcës rrugore, si dhe lirimi i mbingarkesës së trafikut rrugor.