Banorët e fshatit Dumnicë ankohen se ujërat e zeza po derdhen jashtë deponisë së mbeturinave

Në hall kanë thënë se janë banorët e fshatit Dumnicë të Podujevës nga ujërat e zeza që dalin nga deponia e mbeturinave dhe erës së rëndë që kundërmon aty.

Në hall kanë thënë se janë banorët e fshatit Dumnicë të Podujevës nga ujërat e zeza që dalin nga deponia e mbeturinave dhe erës së rëndë që kundërmon aty.

Sipas tyre, kjo gjendje e deponisë u ka shkaktuar dëme në bujqësi, blegtori dhe ua ka bërë të papërdorshëm puset e ujit të pijshëm.

Për shkak të kësaj deponie, banorët thonë se grumbullohen qentë endacakë dhe korbat, të cilët u shkaktojnë dëme në të mbjella.

“Banorët veç janë të shqetësuar shumë edhe për ujëra edhe për të gjitha këto. Nuk lanë sen të Zotit pa prish, as shpend, po as qentë prej kësaj deponie, po uji i zi më së tepërmi që kundërmon edhe ka telashe, kafshët nuk guxojnë me pi këtë, as nuk guxojmë me çelë dritare, as derë, as kurrgjë me dalë në oborr kjo kohë qysh është nuk guxojmë me dalë”, tha Kadri Aliu, përfaqësues i fshatit Dumnicë e Poshtme.

“Pasi jemi shtëpia më e afërt prej deponisë kemi probleme bukur të grumbulluara. E para është uji i ndotur vjen, depërton, kemi tri bunare që i kemi pas të tria na i ka mbyll inspektori, mos i përdorni për pije. Na është dashtë dhentë i ka pas vëllai Tahiri është dashtë me i hjek, ja është dashtë me i çua tri kilometra me pi ujë, ja me i shit”, tha banori Shahin Veseli.

“Kërkesa jonë është të meanxhohet, të largohet uji i zi, të ngeshen mbetrinat dhe të mbulohen. Kaq!” – tha banori Tahir Tahiri.

Zyrtarët komunalë të Podujevës thonë se inspektorët e kanë vërtetuar se ujërat e zeza janë duke rrjedhur jashtë deponisë së mbeturinave në fshatin Dumnicë.

“Inspektorati ka dalë në vendin e ngjarjes, ka mbajtur një procesverbal dhe ka konstatuar se vërtetë ka rrjedhje të ujërave të zeza dhe pas kësaj i është dhënë një afat prej shtatë ditësh për evitimin e rrjedhjes së këtyre ujërave. Dhe në qoftë se nuk ndërmerren masa për largimin e tyre, atëherë inspektorati do që shqiptojë gjobë bazuar në ligjet në fuqi”, tha zëdhënësi i Komunës së Podujevës, Fatri Zhitia.

Zyrtarët e Kompanisë për Menaxhimin e Deponive në Kosovë, nëpërmjet përgjigjeve me shkrim, e pranojnë se kanë marrë vërejtje dhe gjobë për shkak të kësaj gjendjeje.

Por, ata ia hedhin fajin vonesave në OSHP për të angazhuar ndonjë operator që të bëjë mbulimin e mbeturinave.

“Deri tani e kemi pasur të pamundur të intervenojmë me kohë, në mungesë të një kontraktori për shkak të ankesës e cila ka qenë në OSHP, ku në ndërkohë kemi lidhur kontratë me OE, kemi filluar me sanimin e gjendjes dhe besojmë që brenda një jave do të sanohet defekti i paraqitur”, thuhet nga Kompania për Menaxhimin e Deponive në Kosovë.

Ata kanë theksuar se janë në fazën e studimit të fizibilitetit, investim i KFW-së, nga i cili studim përcaktohet nëse deponia duhet mbyllur, zhvendosur apo të rikonstruktohet./KOHA net/N.Toverlani/