“Dilni prej arës se ju vras”/ Shefi sulmon dhe s’i paguan punëtorët që i mori t’ia punojnë tokën

Qytetarët që kryejnë punë fizike shpesh herë hasin në persona të cilët u krijojnë telashe dhe nuk kryejnë obligimin financiar ndaj tyre ashtu siç merren vesh. Me raste ndodh që të përballen edhe me ofendime e kërcënime nga ta, e edhe më keq të sulmohen fizikisht, raporton Gazeta Sinjali.

Një rast i tillë ka ndodhur dje pasdite në fshatin Pestovë të Vushtrrisë, ku një person ka deklaruar se është sulmuar fizikisht nga një 33-vjeçar.

Sinjali mëson se viktima bashkë me katër persona tjerë ishin marrë vesh me të dyshuarin që të punojnë tokën e tij dhe derisa po kryenin punën për të cilën ishin kontraktuar, të njëjtit janë përballur me kërcënime serioze nga pronari i arës.

33-vjeçari dyshohet se u kishte kërkuar punëtorëve që të dalin nga toka e ti, në të kundërtën do t’i vriste dhe më pas i njëjti ka refuzuar t’ua paguajë paratë për të cilat ishin dakorduar që të kryejnë punën.

I dyshuari po ashtu e kishte sulmuar fizikisht viktimën, duke e goditur me shuplaka me ç’rast i ka shkaktuar lëndime trupore. Punëtori ka kërkuar ndihmë mjekësore në spital, teksa rastin e ka denoncuar dhe në Polici.

I dyshuari është arritur që të arrestohet dhe më pas është shoqëruar edhe në stacion policor për intervistim.

Me urdhër të prokurorit ndaj tij është iniciuar rasti për dy vepra penale ‘Lëndim i lehtë trupor’ dhe ‘Kanosje’.