Për nëntë muaj, 712 vepra penale në Podujevë

Më shumë se 700 vepra penale kanë ndodhur për një periudhë nëntëmujore në Komunën e Podujevës.

Në mbledhjen e Këshillit Komunal për Siguri në Bashkësi (KKSB), ku është analizuar gjendja e sigurisë në komunë, siguria në shkolla, gjendja e pyjeve, siguria në komunikacion dhe trajtimi i qenve endacakë, është thënë se për këtë periudhë janë regjistruar 240 incidente.

“Lidhur me gjendjen e sigurisë në komunë, komandanti i Stacionit Policor, Nijazi Jashari raportoi për gjitha rastet e veprave të ndryshme të raportuara në polici gjatë muajve të fundit si dhe statistikat e periudhës janar – shtator. Ndërsa sa i përket veprave penale gjatë kësaj periudhe janë regjistruar 712, ku si incidente janë të regjistruara 240, 35 raste të aksidenteve me lëndime, 191 me dëme materiale, 52 raste me persona të lënduar, 825 raste të realizimit të urdhëresave, 5481 tiketa të shqiptuara, ndërsa raste të vjedhjeve janë 140 raste”, thuhet në një komunikatë për media të Zyrës për marrëdhënie me publikun dhe Informim.

Tutje në komunikatë thuhet se përfaqësuesja e KFOR-it, gjendjen e përgjithshme të sigurisë në Komunën e Podujevës e ka vlerësuar të qetë dhe stabile.

“Edhe Përfaqësuesi i FSK-së, gjithashtu theksoi që gjendja e sigurisë është stabile.

Ndërsa, drejtori i drejtorisë së Arsimit, Avni Fetahu, dha informatë për gjendjen në arsim, ku pavarësisht vonesës së fillimit të vitit shkollor për shkak të grevës, tani procesi mësimor është duke shkuar mirë konform planit. Drejtori Fetahu theksoi shqetësimin për transportin e fëmijëve, ku për shkak të rritjes së çmimeve të derivative, komuna është në proces të zgjidhjes së këtij problemi me prindërit e nxënëseve”.

Për gjendjen e pyjeve dhe sigurinë në komunikacion, sipas komunikatës, kanë raportuar drejtori i Drejtorisë së Bujqësisë, Pylltarisë dhe Zhvillimit Rural, Fatmir Rudari dhe drejtori i drejtorisë së Shërbimeve Publike, Mbrojtje dhe Shpëtim, Bahri Selimi./KOHA net/