Gjenden armë e municion në një veturë, njëri nga të dyshuarit kapet keq me Policinë

Mbajtja e paautorizuar e armëve nga qytetarët po vazhdon të jetë një sfidë për institucionet e rendit. Posedimi dhe përdorimi i tyre shpeshherë ka shkaktuar incidente, që kanë përfunduar edhe tragjikisht. Por kjo siç duket nuk po ua lë shenjë të rinjve, të cilët jo rrallëherë kapen me armë të ndryshme, duke rrezikuar kështu sigurinë publike, raporton Gazeta Sinjali.

Një rast i tillë është zbuluar edhe mbrëmë gjatë një kontrolli të Policisë në Veternik të Prishtinës. Këtë herë, përveç që u konfiskuan armë e municion, Policia hasi edhe në rezistencë.

Burimet nga Prokuroria kanë bërë me dije se fillimisht është ndaluar një veturë, në të cilën kanë qenë dy persona. Pas kontrollit të të dyshuarve dhe veturës, zyrtarët policorë kanë gjetur një armë me fishekë që u konfiskuan.

Kjo bëri që Policia t’i shoqërojë të dyshuarit në stacion, por paraprakisht u përballën me njërin prej tyre.  Siç mëson Sinjali, në shenjë revolte i dyshuari e ka shtyrë zyrtarin policor.

Për të mos eskaluar situata, Policia ka intervenuar duke e arrestuar personin e dyshuar, i cili ka përfunduar në stacion policor.

Ndaj tij, me urdhër të Prokurorit të Shtetit janë iniciuar rastet për armëmbajtje pa leje dhe pengim të personit zyrtar gjatë kryerjes së detyrës zyrtare.