Hovenier: Nuk jemi të kënaqur me afatin për targat, shpresojmë se do të zgjatet

Ambasadori amerikan në Kosovë, Jeff Hovenier thotë se SHBA’të nuk janë të kënaqur me afatin për regjistrimit e automjeteve me targa RKS.

Hovenier thotë se një afat aq i shkurtër për regjistrimin e auomjeteve është i vështirë për qytetarët dhe është e lodhshme, por shpreson se do të ketë zgjatje të afatit.

Tutje tha se nuk ka informacione nëse do të shtyhet afati, mirëpo shpreson se do të ndodhë kjo.

“Është shumë e qartë se deri më tani nuk ka pasur shumë kërkesa për ta bërë këtë (riregjistrimin e automjeteve). Qeveria e Shteteve të Bashkuara beson se vendimi i Qeverisë së Kosovës për t’u lejuar njerëzve që jetojnë në Kosovë të drejtojnë automjete që janë të regjistruara në Kosovë nuk është një kërkesë e paarsyeshme dhe se ky vendim është në përputhje me marrëveshjet e Brukselit, por ne kemi shprehur shqetësime që në fillim dhe vazhdojmë t’i shprehim për afatin kohor të zbatimit.

Mesazhi për Qeverinë e Kosovës ishte se ne besojmë se duhet më shumë kohë, se nuk jemi të kënaqur me afatin e shkurtër, sepse kjo është e vështirë për njerëzit dhe është e lodhshme, shpresojmë të ketë një zgjatje. Kjo ishte pjesë e bisedës sonë. Nuk mund të them nëse do të ndodhë apo jo, sepse më pyetët se çfarë do të ndodhë, por është vendim i Qeverisë së Kosovës”, ka thënë ai për Rtv Kim.