Shumica e shkollave të deklaruara në Podujevë kërkojnë pezullimin e grevës

Shumica e mësimdhënësve të Komunës së Podujevës janë deklaruar pro kthimit të procesit mësimor nga dita e hënë.

Kryetari i Sindikatës së Arsimit në këtë komunë, Fadil Halimi, ka thënë për KOHËN se nga 29 shkolla të deklaruara deri tash, 20 janë pro pezullimit të grevës që ka filluar më 25 gusht.

“Prej 40 shkollave në Komunën e Podujevës, deri tash janë deklaruar 29. Prej tyre 20 janë pro pezullimit të grevës e 9 janë deklaruar kundër. Pro pezullimit janë Gjimnazi ‘Aleksandër Xhuvani’, pastaj shkollat fillore në qytet ‘Xheladin Rekaliu’ e ‘Enver Maloku’, shkollat në fshatra si ‘Ali Hadri’ në Obrançë me dy paralele, ‘Zahir Pajaziti’ në Orllan, ‘Ilir Konushefci’ në Lluga, ‘Drita’ në Majac, ‘Zenel Hajdini’ në Lupç, ‘Emin Duraku’ në Bajçinë, ‘Shefki Kuleta’ në Tërrnavë, etj”, ka deklaruar Fadil Halimi.

Sipas tij, pezullimin e grevës në nivel komunal janë duke e kërkuar edhe shkollat ku aktualisht është duke u zhvilluar mësimi plotësisht ose pjesërisht si “Hamit Sejdiu” në Kërpimeh, “Luigj Gurakuqi” në Batllavë, “Dëshmorët e Kombit” në Podujevë, “Jetullah Gashi” në Dobërdol dhe “Sami Frashëri” në Zhiti. Ndërkohë, shkollat “Elena Gjika” në Shajkofc dhe “Eçrem Çabej” në Buricë kanë mbetur të deklarohen ashtu si do të vendos shumica e shkollave.

“Kundër fillimit të procesit mësimor janë Shkolla e Mesme Teknike ‘Fan S. Noli’, shkollat fillore ‘Naim Frashëri’, ‘Ibrahim Rugova’, ‘Shaban Shala’, ‘Kongresi i Manastirit’ Gllamnik, ‘Kadri Kadriu’ në Llaushë, etj”, ka theksuar Halimi.

Sindikata e Bashkuar e Arsimit, Shkencës dhe Kulturës, njoftoi të mërkurën se do të pyesë anëtarësinë nëse është e pajtimit që greva të ndërpritet dhe mësimi të fillojë më 3 tetor.

Një prej kërkesave të mësimdhënësve është ndarja e 100 eurove shtesë në muaj deri në futjen në fuqi të Ligjit të Pagave. /KOHA net/ N.Toverlani/