I riu në Podujevë ushtron dhunë fizike ndaj babait të tij, përfundon në Polici

Nuk janë të pakta rastet në Kosovë, kur viktima të dhunës në familje janë prindërit të cilët përjetojnë nga fëmijët e tyre dhunë psikike e fizike. Një rast i tillë ka ndodhur mbrëmë në rrugën “Dukagjini” të Podujevës, raporton Gazeta Sinjali.

Në një shtëpi në këtë rrugë, djali 22-vjeçar po dyshohet se ka ushtruar dhunë fizike ndaj babait të tij, çka ka bërë që të ndërhyjë Policia për të zgjidhur telashet.

Sinjali mëson se burri është detyruar që ta denoncojë djalin e tij, për të cilin ka deklaruar se e ka sulmuar fizikisht. Si pasojë e kësaj, i riu është arrestuar e më pas është shoqëruar në stacion policor për intervistim.

22-vjeçari para hetuesve policorë ka mohuar të ketë sulmuar babain e tij.

Prokurori i Shtetit ka urdhëruar që i dyshuari të hetohet në procedurë të rregullt për veprën penale ‘Dhunë në familje’.