Arrestime për rastin Brezovica, dy të arrestuar edhe në Podujevë

Shtatë persona janë arrestuar sot në rastin e njohur “Brezovica”. Nga ta janë 3 biznesmenë dhe katër zyrtarë shtetëror.

Burime të “Indeksonline” bëjnë të ditur se në mesin e të arrestuarve është Shukri Shabani, zyrtar i Ministrisë së Mjedisit dhe Planifikimit Hapësinor apo e njohur tani Ministria e Infrastrukturës.

Kujtojmë se Prokuroria Themelore në Ferizaj ka konfirmuar se nga ky aksion janë kontrolluar dhe bastisur njëmbëdhjetë (11) lokacione të ndryshme, konkretisht tetë (8) lokacione në qytetin e Prishtinës, dy (2) në Podujevë dhe një (1) në Fushë Kosovë, ku me ç’rast, janë arrestuar shtatë (7) persona të dyshuar.

Të njëjtit me vendim të Prokurorit të Shtetit, janë ndaluar në kohëzgjatje prej 48 orësh, për shkak të dyshimit se të njëjtit kanë kryer veprat penale “Marrja e ryshfetit”, nga neni 421 i Kodit Penal të Republikës së Kosovës “Dhënia e ryshfetit”,nga neni 422 , “Fajdeja” nga neni 331 dhe “Ushtrimi i ndikimit” nga neni 424 të Kodit Penal të Republikës së Kosovës. /Indeksonline