Heqja e vizave për Kosovën në agjendën e tetorit

Në Bashkimin Evropian vazhdojnë të hezitojnë në dhënien e datave se kur kosovarëve do t’u hiqet regjimi i vizave. Por diplomatë evropianë i kanë thënë KOHËS se procesi i liberalizimit së shpejti do të mund të hyjë në fazën përfundimtare. Çështja e liberalizimit të vizave do të jetë në agjendën e grupeve punuese të Këshillit të BE-së në tetor të këtij viti

Procesi i liberalizimit të vizave për Kosovën, së shpejti mund të hyjë në fazë vendimtare, kanë thëne burime diplomatike të KOHËS në Bruksel.

Këto burime thonë se gjatë muajit tetor, çështja e liberalizimit të vizave për Kosovën do të nisë të diskutohet në grupet punuese të Këshillit të Bashkimit Evropian.

Këshilli është pikërisht vendi ku procesi ka mbetur peng për më shumë se tre vjet, pasi edhe Komisioni Evropian edhe Parlamenti Evropian kanë konfirmuar mbështetjen për vendimin për liberalizimin e vizave.

Komisioni Evropian vazhdimisht ka konfirmuar se Kosova i ka përmbushur të gjitha kriteret e kërkuara nga ajo dhe në të njëjtën kohë Komisioni përsërit se mbetet në këtë qëndrim.

Parlamenti Evropian jo vetëm se ka dhënë pëlqimin për heqjen e vizave, por edhe ka kritikuar vendet anëtare pse është vonuar kaq shumë ky vendim.

Parlamenti ka bërë thirrje disa herë që vendimi të miratohet sa më shpejt dhe pa vonesa të reja.

Në selinë e BE-së në Bruksel kanë thënë është evidente se ekziston një mbështetje politike për heqjen e vizave edhe nga vendet kryesore anëtare.

Këtë e kanë dëshmuar në një deklaratë të përbashkët edhe ministrat e Jashtëm të Gjermanisë, Francës dhe Polonisë, ku kërkojnë progres në procesin e liberalizimit të vizave.

“Ne bëjmë thirrje për progres përkitazi me liberalizimin e vizave për Kosovën”, thuhet mes të tjerash në deklaratën e përbashkët të Trekëndëshit të Vaimarit, të publikuar të premten.

Mbështetja pikërisht e këtyre shteteve mund të jetë kyç që procesi të nisë dhe të përmbyllet në Këshillin e BE-së, ku bëjnë pjesë përfaqësuesit e 27 vendeve anëtare.

Franca krahas Holandës ka qenë ndër vendet skeptike lidhur me vendimin për heqjen e regjimit të vizave për kosovarët.

Liberalizimi i vizave për Kosovën së pari pritet të jetë në rend të ditës në grupin punues të vizave, diku në mesin e muajit tetor. Në atë kohë pritet që edhe Komisioni Evropian, më saktësisht me datën 12 tetor, nëse nuk ndryshon plani, në raportet vjetore të Progresit ta përsërisë qëndrimin që Kosova vazhdon t’i përmbushë kriteret për liberalizimin e vizave.

Ekspertët e Komisionit Evropian pritet të marrin pjesë edhe në takime me përfaqësues të shteteve anëtare, ku mund të raportojnë në detaje për progresin që Kosova ka arritur në përmbushjen e kritereve. Nga këto diskutime do të varet se sa shpejt do të vazhdojë procesi.

Ndërkohë, thonë diplomatët në Bruksel, edhe Kosova duhet t’i vazhdojë kontaktet në nivel të ekspertëve të ministrive të Punëve të Brendshme me kolegë nga vendet anëtare, për të adresuar çdo shqetësim eventual që ata mund të kenë.

Përshtypja në Bruksel është se procesi i liberalizimit të vizave për Kosovën tash po hyn në fazën vendimtare, por diplomatët në BE vazhdojnë të hezitojnë që të zotohen për një datë apo afat kohor se kur mund të ndodhë edhe vendimi formal.

Sinjalet pozitive se liberalizimi i vizave do të ndodhë së shpejti janë shpeshtuar kohëve të fundit.

Qysh nga qershori kur u mbajt edhe samiti mes liderëve të Ballkanit Perëndimor e Bashkimit Evropian, u afirmua mbështetja për këtë çështje.

Në këtë samit, presidentja Vjosa Osmani kërkoi mbështetjen e shteteve anëtare të Bashkimit Evropian.

“Qytetarët e mi ndihen të diskriminuar, pavarësisht se janë populli më pro-evropian dhe i plotësojnë të gjitha kriteret prej 4 vjetësh. Ata mbeten të izoluar në zemër të kontinentit ku jetojnë. Ironia është që ne jemi këtu si anëtarë të barabartë të komunitetit ndërkombëtar, duke diskutuar agjendën evropiane, por sigurisht që unë ulem mes jush sot këtu si i vetmi person – i vetmi person – në këtë tryezë që duhet të marrë një vizë për të marrë pjesë në këtë samit”, kishte deklaruar Osmani gjatë fjalimit të saj, derisa para nisjes së punimeve ajo kishte thënë se nuk dëshiron që të krijojë pritshmëri te qytetarët e Kosovës.

Se heqja e vizave është afër e ka thënë në qershor edhe emisari i Bashkimit Evropian për dialogun Kosovë-Serbi, Miroslav Lajçak.

“Ka një mendim mjaft të palëkundur mes shteteve anëtare të BE-së që Kosovës i duhej dhënë liberalizimi i vizave shumë kohë më parë. Nuk ka asnjë dyshim që Kosova i ka plotësuar të gjitha kushtet për të hequr sistemin e vizave, dhe problemi qëndron sërish te mungesa e konsensusit. Por mund të them që kjo problematikë po ngrihet mes vendeve anëtare shumë më shpesh, gjatë takimeve të organeve të ndryshme evropiane, ndaj mendoj se është afër. Nuk guxoj të them një datë, por ajo po vjen dhe këtë e them me siguri të plotë”, kishte theksuar Lajçaku në një intervistë për “Euronews Albania”.

Thirrja për liberalizim të vizave deri në fund të këtij viti ishte në mesin e konkluzioneve të dala edhe nga punimet e samitit e Bërdo Brijunit, të cilat u përmbyllën javën e kaluar.

Qytetarët e Kosovës janë të vetmit në rajon që nuk mund të lëvizin të lirë në zonën Shengen.