Shkolla “Enver Maloku” në Podujevë vazhdon grevën, shpërfillet kërkesa e Kurtit

As pas vizitës së kryeministrit Albin Kurti dhe kryetarit të Podujevës, Shpejtim Bulliqi, në shkollën “Enver Maloku” nuk ka nisur mësimi. Megjithatë, thirrjeve të tyre për vazhdimin e procesit mësimor iu përgjigjen disa prindër e nxënës, por ata u kthyen mbrapa, pasi që u njoftuan se greva do të vazhdojë, shkruan Kanal10.

Të hënën, për pak çaste dukej gjithçka normale dhe se klasa ishte plot me nxënës, por një ditë më pas, bankat sërish mbeten të zbrazëta.

Edhe pas vizitës së kryeministrit Albin Kurti dhe kryetarit të Podujevës, Shpejtim Bulliqi, në shkollën “Enver Maloku” në këtë komunë, as të martën nuk nisi mësimi.

Një ditë më parë, nga ambientet e kësaj shkolle, Kurti dhe Bulliqi bënë thirrje që të ndërpritet greva dhe mësimi të vazhdojë, por kërkesa e tyre nuk është marr parasysh.

Megjithatë, thirrjes së tyre iu përgjigjën disa nxënës e prindër, por pas pak minutave ata u njoftuan se mësim nuk do të ketë.

Megjithatë, drejtori i shkollës, insistonte që mësimi do të fillojë.

Mirëpo, dy minuta më vonë të gjithë nxënësit dolën jashtë, pasi atyre u është thënë se do të pajisen me literaturë, por nuk do të zhvillojnë procesin mësimor.

Mos fillimi i procesit mësimor ka shkaktuar pakënaqësi te prindërit.

E nga Drejtoria Komunale e Arsimit në Podujevë kanë thënë se mësimdhënësit e kësaj komune e kanë vazhduar grevën.

Ndryshe, nga kjo komunë kanë thënë se disa mësimdhënës në disa shkolla nuk e kanë respektuar thirrjen për grevë dhe kanë mbajtur orët mësimore, pa dhënë detaje tjera rreth numrit të tyre. /Gazeta10