Konsiderohet e pakuptimtë vonesa e zbatimit të rregullores për mbeturina në Podujevë

Rregullorja për menaxhimin e mbeturinave në Komunën e Podujevës ende nuk po gjen zbatim të plotë. Edhe pse është miratuar në vitin 2019, hyrja në fuqi e saj është shtyrë për tre herë radhazi. Hyrja në fuqi ka ndodhur më 1 korrik të këtij viti, porse zyrtarët komunalë pranojnë se zbatimi 100 për qind i saj është i pamundur në këtë fazë. Ndërkaq, përfaqësues nga shoqëria civile e kanë kualifikuar të pakuptimtë vonesën e zbatimit të këtij dokumenti.

Vështirësi në implementimin e një dokumenti u janë shfaqur zyrtarëve komunalë në Podujevës. Rregullorja për menaxhimin e mbeturinave, që është miratuar në vitin 2019, ende nuk ka gjetur zbatim, pasi që tri herë deri më tash është shtyrë hyrja e saj në fuqi. Megjithëkëtë, më 1 korrik të këtij viti zyrtarisht ka hyrë në fuqi implementimi i saj, sipas zyrtarëve komunalë, ani se tash për tash në mënyrë të pjesshme.

“Si rregullore është e hartuar mirë, mirëpo i ka disa mangësi për shkak të pamundësisë që ne të funksionalizojmë apo të bëjmë të zbatueshme 100% e që lidhet me inkasimin e të hyrave e që kryesisht lidhet me nenin 7 të kësaj rregulloreje, pika 1, ku thuhet ‘taksa e mbeturinave faturohet dhe arkëtohet nga Komuna’. Një gjë e tillë nuk është bërë ende. Ne për ta bërë të fuqishëm edhe këtë nen, duhet të merren disa masa shtesë dhe kjo duhet fillimisht të bëhet një softuer i ri, me ç’rast edhe e mundëson arkëtimin apo inkasimin e mbeturinave për ekonomitë familjare”, ka thënë Bahri Selimi, drejtor për shërbime publike në Komunën e Podujevës.

Krahas pikës 1 të nenit 7, drejtori Selimi ka vlerësuar se problem del të jetë edhe pika 6 e tij, që e kushtëzon nxjerrjen e dokumenteve komunale me pagesën e faturave të mbeturinave e dhe mungesa e punëtorëve. Për çështjen e kushtëzimit, ai ka thënë se niveli qendror ka nxjerrë një vendim, por që bie ndesh me të drejtat e njeriut.

E vonesën për hyrjen në fuqi të kësaj rregulloreje janë duke e cilësuar si të pakuptimtë edhe përfaqësues nga shoqëria civile.

“Kjo do të ndikonte edhe në mirëmbajtjen e ambientit, pra duke marrë parasysh që nëse obligohen qytetarët të paguajnë mbeturinat, natyrisht se nuk do të hidhnin vend e pavend mbeturinat. Natyrisht, ndoshta sfidë do të jetë se jo secila shtëpi është e banuar, kjo do të jetë sfidë për inkasimin e atyre të hyrave. Mirëpo, mendoj që kjo rregullore duhet të fillojë të funksionalizohet, për arsye se do të ndikonte edhe në mirëmbajtjen e ambientit”, ka thënë drejtori ekzekutiv i OJQ “Sundimi i Demokracisë në Kosovë”, Rexhep Zeka.

Në këtë rregullore parashihet që zyrtarët komunalë të mos e lëshojnë asnjë dokument, përveç atyre të gjendjes civile, për personat që nuk i paguajnë faturat e mbeturinave, si dhe që pagesa të bëhet në komunë e jo nëpër kompani, siç është aktualisht.

Drejtori për Shërbime Publike, Mbrojtje dhe Shpëtim, Bahri Selimi, ka theksuar se janë duke u hulumtuar forma se si të përfshihen në sistem të gjitha familjet, pasi që aktualisht, nga 35 mijë familje, vetëm 9 mijë i paguajnë faturat e mbeturinave./KOHA.net/N.Toverlani/