Lajm i keq, bujqit në Podujevë duhet ta presin ligjin e ri për kompensim

Breshri që ka rënë sivjet dy herë gjatë muajit qershor ka dëmtuar shumë kultura bujqësore në Komunën e Podujevës. 400 është numri i fermerëve që kanë aplikuar për kompensim. Por, ata nuk do të mund të kompensohen edhe për një kohë, pasi Ministria e Bujqësisë, Pylltarisë dhe Zhvillimit Rural është duke pritur ta miratojë ligjin e ri, që e parasheh edhe kompensimin nga fatkeqësitë natyrore

Rreth 400 fermerë të Komunës së Podujevës po e presin kompensimin për dëmet e pësuara sivjet nga breshri.

Pas kërkesave të deponuara në komunë nga këta fermerë, Komisioni komunal ka dalë në terren për ta bërë verifikimin e dëmeve.

Zëdhënësi i Komunës së Podujevës, Fatri Zhitia, ka treguar se në shumicën e rasteve janë përputhur të dhënat e deponuara nga bujqit e dëmtuar, porse ka pasur edhe raste të mbivlerësimit të atyre dëmeve.

“Numri total i kërkesave që i janë adresuar Komunës së Podujevës për dëmet që u janë shkaktuar nga breshri dy herët e fundit gjatë vitit 2022 është shifra diku afërisht 400 kërkesa. Këto kërkesa si institucione lokale i kemi adresuar në Ministrinë e Bujqësisë, ku edhe po shpresojmë që Ministria ta bëjë edhe kompensimin e këtyre dëmeve”, ka thënë Zhitia.

Megjithatë, këto kërkesa edhe për një kohë nuk do të marrin përgjigje pozitive nga Ministria e Bujqësisë, Pylltarisë dhe Zhvillimit Rural. Kjo ministri, sipas zëdhënësit Zhitia, është duke e përgatitur një ligj të ri që e parasheh edhe kompensimin e dëmeve nga fatkeqësitë natyrore.

Vetë fermerët e dëmtuar, disa prej të cilëve i ka kontaktuar KOHA, nuk kanë dashur të deklarohen.

Zhitia ka thënë se në rast të vonesave, për këta fermerë do të vlejë ligji aktual.

“Sipas zyrtarëve të Ministrisë së Bujqësisë, na është thënë se duhet të presim edhe pak muaj për shkak se është duke u hartuar ligji i ri, i cili e përfshin edhe kompensimin e dëmeve për fermerët, të cilët pësojnë nga fatkeqësitë natyrore dhe në rast se ky ligj mund të vonojë, atëherë dëmi fermerëve do t’u kompensohet bazuar në ligjin e vjetër”, shtoi Zhitia.

Ai ka theksuar se zyrtarët e Ministrisë kanë kërkuar nga Komisioni komunal që të bëjë evidentimin e dëmeve vetëm të kulturave bujqësore, por jo edhe vlerën e tyre, pasi edhe kjo çështje, sipas tyre, do të përcaktohet me ligjin e ri.

KOHA ka adresuar pyetje edhe në Ministrinë e Bujqësisë, Pylltarisë dhe Zhvillimit Rural, por deri në momentin e raportimit nuk ka marrë përgjigje./KOHA.net/N.Toverlani/