PODUJEVË: 2 vite burgim e 3 mijë euro gjobë për të akuzuarin që kanosi me AK-47 policin dhe 500 euro gjobë për vëllanë e tij se dëmtoi një veturë

Gjykata Themelore në Prishtinë e ka dënuar me 2 vite burgim efektiv dhe 3 mijë euro gjobë R. A. për sulm ndaj personit zyrtar, përdorim të armës dhe armëmbajtje pa leje, ndërsa R. A. me 500 euro gjobë për asgjësim apo dëmtim të pasurisë.

Aktgjykimi ndaj dy vëllezërve është shpallur të enjten nga gjykatësja Fatime Dermaku, pasi që të akuzuari në seancën e  shqyrtimit fillestar të mbajtur më 13 qershor 2022 e kishin pranuar fajësinë për veprat që u viheshin në barrë, raporton “Betimi për Drejtësi”.

Fillimisht, i akuzuari R. për sulm ndaj personit zyrtar është dënuar me një vit burgim efektiv, për përdorim të armës me një vit e dy muaj dhe për armëmbajtje pa leje me 3 mijë euro gjobë.

Andaj, të njëjtit gjykata i ka shqiptuar dënim unik me 2 vite burgim dhe 3 mijë euro gjobë.

Kurse, të akuzuarit R., gjykata i shqiptoi dënim me 500 euro gjobë.

Gjykatësja Dermaku ka njoftuar se të akuzuarit R. në dënimin e shqiptuar do t’i llogaritet edhe koha e kaluar në paraburgim nga 19 shkurti e deri më 13 qershor 2022, dhe të akuzuarit R. koha e kaluar në arrest shtëpiak nga 20 shkurti e deri më 19 mars 2022.

Gjithashtu të akuzuarit R. i është konfiskuar arma e llojit AK-47.

Të njëjtit janë obliguar që të paguajnë nga 50 euro (secili veç e veç), në emër të fondit për viktimat e krimit.

Pala e dëmtuar për realizimin e kërkesës pasurore-juridike është udhëzuar në kontest civil.

Palët e pakënaqura ndaj këtij vendimi kanë të drejtë ankese në afat prej 15 ditësh nga dita e marrjes së kopjes së këtij aktgjykimi.