Kryetari Bulliqi po qëndron në vizitë zyrtare në Austri

Kryetari i Komunës, Shpejtim Bulliqi, me ftesë të kryetarit të Komunës së Linzit po qëndron në vizitë zyrtare në Austri.

Gjatë ditës së djeshme Bulliqi është takuar me kryetarin e Komunës së Steyer, z. Markus Vogl, me të cilin kanë diskutuar për mënyrën e bashkëpunimit në fushën e ambientit, arsimit dhe mundësitë për aplikimin e shembujve austriak gjatë ndërtimit të Zonës Industriale në Podujevë, ku edhe i ka ftuar bizneset e këtij qyteti për investime në Podujevë.

Bulliqi ka zhvilluar takim edhe me nënkryetaren e Linzit, znj. Tina Blochl, me të cilën në fokus të diskutimit ishin fushat se ku mund të bashkëpunojmë tashmë si dy komuna miqësore dhe nxitja e investimeve nga ana e kompanive industriale të Linzit në qytetin e Podujevës.

Bulliqi tha” Për mua është detyrë parësore të sjellim investitorë të jashtëm në qytetin tonë dhe të gjenerojmë vende të reja pune”.

Pas këtyre takimeve kryetari Bulliqi ka vizituar edhe shkollën fillore dhe të mesme të ulët në Linz, ku aty ka takuar mësuesin e lëndës së gjuhës shqipe, Ismet Sinani dhe nxënësit shqiptarë.

Bulliqi i ka përgëzuar për punën dhe angazhimin e tyre mësuesin dhe nxënësit si dhe ka shprehur gatishmërinë që nxënësit shqiptarë në Linz t’i furnizojmë përmes komunës së Podujevës me libra dhe literaturë shqipe nxënësit shqiptarë në Austri, me qëllim të ruajtjes dhe kultivimit të gjuhës, kulturës dhe traditës shqiptare.

Kryetari Bulliqi edhe sot gjatë ditës do të zhvillojë takime dhe vizita të ndryshme në qytetin e Linzit.