Reagon Bulliqi: Kjo është arsyeja pse kam emëruar dy drejtor që vijnë nga PDK-ja

Kryetari i Podujevës, Shpejtim Bulliqi ka prezantuar ekipin e tij me të cilin do të udhëheq komunën e Podujevës për katër vitet e ardhshme, njofton PodujevaPRESS.net

Gjatë prezentimit shihen edhe dy emra që vijnë nga PDK konkretisht Drejtore e Drejtorisë së Administratës: Antoneta Ejupi dhe Drejtor i Drejtorisë së Bujqësisë, Pylltarisë dhe Zhvillimit Rural: Fatmir Rudari I cili në mandatin e kaluar ishte edhe shef grupi në asamblen komunale.

E për këtë shkak ka reaguar vet i pari i komunës. Bulliqi ka shkruar se me qëllim të funksionalizimit dhe konsolidimit të legjislativit dhe ekzekutivit të komunës, ne i kemi përfshirë dy drejtorë që vijnë nga radhët e PDK-së dhe e kemi votuar edhe kandidatin e tyre për kryesues kuvendi.

Ky është postimi i tij:

Sqarim për opinionin publik dhe mediat

Me qëllim të funksionalizimit dhe konsolidimit të legjislativit dhe ekzekutivit të komunës, ne i kemi përfshirë dy drejtorë që vijnë nga radhët e PDK-së dhe e kemi votuar edhe kandidatin e tyre për kryesues kuvendi.

Duke qenë të vetëdijshëm për mungesën e numrave në Kuvendin Komunal dhe përgjegjësisë që na obligon si parti fituese e zgjedhjeve dhe mirëkuptimit që kemi hasur te grupi i këshilltarëve të PDK-së, kemi bërë më të mirën e mundshme që të vazhdojmë qeverisjen e mirë në katër vitet e ardhshme.