Qeveria vendos përfundimisht për “njeriun e LDK-së”, të propozuar nga Agim Veliu (Dokument)

Qeveria e Kosovës ka vendosur për “shkarkimin final” të Shpend Tërdevajt, edhe pas vendimit te Këshillit të Pavarur Mbikëqyrës për Shërbimin Civil për kthimin e lëndës së tij në rivendosje.

Në mbledhjen e sotme, kabineti i Kurtit rikonfirmoi vendimin për shkarkimin e Tërdevajt.

Sekretari i Këshillit të Sigurisë së Kosovës është shkarkuar më 21 nëntor me vendim të qeverisë Kurti.

Ai, ishte emëruar në këtë pozitë rreth një vit e gjysmë më parë nga kabineti i ish-qeverisë Hoti. Ishte propozuar për këtë pozitë nga ish-ministri i Brendshëm, Agim Veliu.

Sipas asaj që kishte thënë ministri Veliu, deri tek përzgjedhja e tre kandidatëve të suksesshëm për pozitën e Sekretarit të KSK-së ishin zhvilluan procedura në pajtim me dispozitat ligjore.

“Për këtë pozitë, Komisioni ka vlerësuar në mënyrë detale 17 aplikacione dhe prej tyre pesë janë selektuar për listë të ngushë. Komisioni, në bazë të rezultateve sipas intervistës, ka rekomanduar këta tre emra: Shpend Tërdevaj, Arbër Hadri dhe Nisim Mesushta. Në pajtim me Ligjin dhe Rregulloren, kryeministri i propozon qeverisë njërin prej kandidatëve të preferuar”, ka deklaruar ministri Veliu.

Shpend Tërdevaj më parë ka qenë funksionar i Lidhjes Demokratike. Në vitin 2007, ai kishte garuar për Asamblenë Komunale të Klinës nga radhët e LDK-së, ndërkaq nga 2007 deri më 2010 në Qeverinë Thaçi 2 – pjesë e së cilës ishte edhe LDK – ai ishte emëruar zëvendësministër i MAPL-së.

Marrëdhënia e tij me pushtetin e LDK-së kishte vazhduar edhe më vonë, kur ishte emëruar për herë të parë në pozitën më të lartë udhëheqëse të KSK-së.

Për herë të parë në pozitën e Sekretarit të Këshillit të Sigurisë së Kosovës, Tërdevaj ishte emëruar më 22 mars të vitit 2017 me propozimin e ish-kryeministrit Isa Mustafa.

Këshilli i Sigurisë së Kosovës, i cili funksionon në kuadër të Zyrës së Kryeministrit të Kosovës, ka rol këshillues në të gjitha çështjet që lidhen me sigurinë e Kosovës dhe kontributin e tij për stabilitetin rajonal. Ajo rekomandon politika dhe strategji për sigurinë.

Më poshtë gjeni vendimin e Qeverisë Kurti.