Ju dha lamtumira e fundit nënoficerit të FSK-së dhe ish ushtarit të UÇK-së, Besim Bajraktari

20/01/2022 4 min read

Sot është bërë varrimi i nënoficerit të FSK-së dhe ish ushtarit të UÇK-së, Besim Bajraktari, njofton PodujevaPRESS.net

Në prani të një numri shumë të madh të qytetarëve dhe me prezencën e shumë personalitetve civile e ushtarake ju dha lamtumira e fundit në fshatin Batllavë të Podujevës.

Nga ora 10 në kazermën “Adem Jashari” u bënë homazhe. Prezent ishte edhe vet ministri i Mbrojtjes, Armend Mehaj, I cili ka shkruar në një postim në Facebook;

Sot nga kazerma “Adem Jashari” ku shërbeu për herë të fundit, me dhembje të madhe, i dhamë lamtumirën, Luftëtarit të Lirisë, Ushtarakut të rryer e shokut shumë të dashur, rreshter Besim Bajraktari.

Ushtria jonë, do të zhvillohemi e forcohemi me respektin për gjurmët e mëdha të suksesit që na la ai!

Trashëgimia që na la Rreshter Bajraktari është kujtimi dhe trashëgimia e shembullit të veçantë që do të jetë mes nesh gjithmonë!

Mbi dhembjen qoftë gjithmonë krenaria për të!

Ndërsa kryetari i Podujevës, Shpejtim Bulliqi po ashtu ka shkruar;

I dhamë lamtumirën e fundit nënoficerit të FSK-së dhe ish ushtarit të UÇK-së, Besim Bajraktari. Angazhimi, puna dhe veprimtaria e tij si në luftën çlirimtare, poashtu edhe në forcimin dhe zhvillimin e Forcave të Armatosura të Kosovës do të kujtohet dhe nderohet përherë sepse është punë e madhe dhe e pashlyeshme që ka bërë si në luftë ashtu edhe në paqe.

Besim Bajraktari do të kujtohet përherë si një ushtarak i dalluar, familjar i përkushtuar dhe njeri me vlera të larta morale e profesionale. Familja Bajraktari dhe kolegët e tij nga Ushtria Çlirimtare e Kosovës dhe FSK duhet të ndjehen krenar për familjarin dhe shokun e tyre. I qoftë i lehtë dheu i Kosovës!