Parkingu i Komunës së Podujevës në shërbim të mërgimtarëve

Kryetari i Komunës së Podujevës, Shpejtim Bulliqi prej dje ka urdhëruar që parkingu i komunës të shfrytëzohet nga mërgimtarët.

“Për nder të ardhjes së bashkatdhetarëve në vendin tonë, kam marrë vendim që të lejojë parkimin e automjeteve të bashkatdhetarëve në parkingun brenda oborrit të Komunës (gjatë 24 orëve), gjatë qëndrimit të tyre për pushime dimërore në Kosovë. Ky vendim hyn në fuqi prej datës 25 dhjetor dhe vlen deri më 10 janar.”, thuhet në kumtesën komunale.

“Hapësira lejohet për shfrytëzim 24 orë dhe pa pagesë. Për zbatimin e vendimit kujdeset Drejtoria e Administratës, organizon dhe cakton personelin përkatës për mbarëvajtjen e procesit”, thuhet në vendim.