Për të pestën herë dështon të fillojë rigjykimi në rastin e njohur “FAN”

Mungesa e prokurores Fikrije Fejzullahu, të akuzuarit Agim Deshishku, mbrojtësit të të akuzuarit Naser Osmani, avokatit Besnik Berisha, mbrojtësit të të akuzuarit Adrian Kelmendi, avokatit Visar Vehapi dhe mbrojtësit të të akuzuarit Naim Avdiu, avokati Fisnik Salihu, u bë shkak që të dështojë seanca e së enjtes në Gjykatën Themelore në Prishtinë.

Në këtë rast, ish-deputetit të Lidhjes Demokratike të Kosovës (LDK), Naser Osmani dhe zyrtarët e Agjencisë Kosovare të Privatizimit (AKP) Melita Ymeraga, Adrian Kelmendi, Bahri Shabani, Shkëlzen Lluka dhe Naim Avniu, po akuzohen për veprën penale të keqpërdorimit të pozitës zyrtare. Ndërsa, i akuzuari Agim Deshishku po gjykohet për legalizim të përmbajtjes së rreme.

Sipas kryetarit të trupit gjykues Agim Kuçi, avokati Besnik Berisha, si mbrojtës i të akuzuarit Naser Osmani, e ka pranuar ftesën për seancën e sotme, por mungesën nuk e ka arsyetuar, raporton “Betimi për Drejtësi”.

Në këtë seancë ka munguar edhe mbrojtësi i të akuzuarit Naim Avdiu, avokati Fisnik Salihu, për të cilin gjykatësi Kuçi tha se ka qenë i njoftuar për shqyrtimin e sotëm nga seanca e kaluar.

Kurse, avokati Visar Vehapi, si mbrojtës i të akuzuarit Adrian Kelmendi, sipas këtij të fundit, ka munguar ngase ka qenë duke marrë pjesë në një seancë tjetër.

Tutje, gjykatësi Kuçi ka bërë të ditur se ftesën për të akuzuarin Agim Deshishku e ka pranuar gruaja e tij, ndërsa mungesën e tij në seancë e ka arsyetuar avokati i tij Muhamet Binaku.

Ai tha se i akuzuari Deshishku nuk është në gjendje të mirë shëndetësore dhe për këtë ia ka dorëzuar gjykatës raportin specialistik të 12 dhjetorit 2021.

Po ashtu, ka munguar përfaqësuesi i palës së dëmtuar Administrata Tatimore e Kosovës (ATK), i cili sipas gjykatësit Kuçi ftesën e ka pranuar në mënyrë të rregullt, mirëpo mungesën nuk e ka arsyetuar.

Në këto rrethana, trupi gjykues ka vendosur që shqyrtimi i sotëm gjyqësor të shtyhet dhe se për seancën e radhës, për të akuzuarin Deshishku, do të lëshohet urdhëresë për sjelljen e tij me detyrim nga ana e Policisë së Kosovës.

Në mungesë të kushteve për mbajtjen e seancës, rigjykimi në rastin e njohur “FAN” është shtyrë për të pestën herë, kurse seanca e radhës është caktuar më 23 dhjetor 2021./BetimiperDrejtesi/