Për mungesë kuorumi ndërpriten punimet e seancës së kuvendit

Kuvendi i Komunës së Podujevës mbajti sot mbledhje të jashtëzakonshme të thirrur për zgjedhjen e kryesuesit dhe Komitetit për Politikë dhe Financa, por e cila u ndërpre për shkak të mungesës së kuorumit.

Edhe seancën e dytë, të jashtëzakonshme e udhëhoqi, anëtari më i moshuar, Ilmi Hoxha, ndërsa në të mori pjesë edhe kryetari i komunës së Podujevës, Shpejtim Bulliqi.

Pas fillimit të procedurave për zgjedhjen e kryesuesit të kuvendit, grupet e asambleistëve nga Lidhja Demokratike e Kosovës (LDK), Partia Demokratike e Kosovës (PDK) DHE Aleanca për Ardhmërinë e Kosovës (AAK) kanë braktisur punimet e kuvendit.

Valon Demolli, nga LDK-së dhe Bashkim Syla nga PDK, kanë dhënë arsyet për braktisjen e seancës.

Ndërsa Kryetari Bulliqi në adresimin e tij ftoj partitë politike të përfaqësuara në kuvend, që të sillen në mënyrë institucionale dhe të kontribojnë në konstituimin e kuvendit.

Pas rishikimit të prezencës në kuvend, kryesuesi i seancës ka ndërprerë punimet për shkak se u konstatua se mungon kuorumi për të vazhduar me punimet.