A ka vendosur PDK-ja në Podujevë se cilin kandidat do ta mbështet në balotazh

Aleanca për Ardhmërinë e Kosovës ende nuk ka vendosur nëse do ta përkrahë njërin nga kandidatët për kryetar të Podujevës, të LDK-së apo VV-së në rrethin e dytë të votimit që do të mbahet më 14 nëntor.

Këtë vendim, sipas zyrtarëve të AAK-së do ta marrin brenda dy ditësh.

Ndërkohë, zyrtarët e PDK-së në Podujevë nuk janë përgjigjur rreth kësaj çështjeje.

Në balotazh do të ballafaqohen sërish kandidati i LDK-së, Ekrem Hyseni i cili në raundin e parë ka marrë 16 mijë e 925 vota ose 44.20 për qind dhe Shpejtim Bulliqi nga LVV i cili ka vetëm 18 vota më pak – 16 mijë e 907 ose 44.16 për qind.

KOHA ka kontaktuar edhe ish-kandidaten e PDK-së për kryetare të Podujevës, Floretë Zejnulahu, dhe ia ka përcjellë pyetjet edhe me shkrim, por as nuk ka kthyer përgjigje e as nuk e ka hapur telefonin. PDK në Podujevë është ende pa kryetar dege, pasi ish-kryetari Naim Fetahu kishte dhënë dorëheqje pas rezultatit jo të mirë në zgjedhjet e jashtëzakonshme për kryetar të Podujevës në vitin e kaluar. /Nexhat Toverlani, Koha.net/