19 vendvotime të Podujevës shkojnë në rinumërim, për shkak të parregullësive gjatë numrimit të votave

Në Qendrën e Numërimit dhe Rezultateve (QNR) ka nisur procesi i rinumërimit të 292 vendvotimeve për Kuvende Komunale.

Zëdhënësi i KQZ-së, Valmir Elezi, ka thënë se Komisioni Qendror i Zgjedhjeve ka vendosur që t’i dërgojë në rinumërim këto vendvotime pas ka mospërputhje të votave të subjekteve politike me ato të kandidatëve dhe anasjelltas.

“Ka filluar procesi për rinumërimin e rreth 300 vendvotimeve që u takojnë zgjedhjeve lokale për Kuvende Komunale, të cilat u mbajtën më 17 tetor. KQZ-ja ka marrë vendim për rinumërim të këtyre vendvotimeve, pasi ka mospërputhje të votave të subjekteve politike me ato të kandidatëve. Në disa raste subjektet politike kanë vota por jo edhe kandidatët, apo anasjelltas”, ka thënë Elezi.

Sipas tij, rinumërimi i këtyre vendvotimeve mund të marrë kohë disa ditë, dhe se nëse nuk do të ketë rinumërim tjetër, KQZ-ja do të mund ta shpallë rezultatin përfundimtar të zgjedhjeve për Kuvende Komunale shumë shpejtë.

Komunat me më së shumti vendvotime që do të rinumërohen janë Prishtina me 40, Prizreni me 25, Peja me 20 dhe Podujeva me 19 vendvotime.

Burimet e PodujevaPRESS pran KQZ-së kanë thënë se nëse edhe këto 19 vendvotime dalin me shumë parregullësi atëherë Podujeva mund të shkojë në rinumrim të plotë.