1,200 euro dënohet Vetëvendosja sepse kjo kandidate për asamble në Podujevë vendosi poster në hapsirë publike

Paneli Zgjedhor për Ankesa dhe Parashtresa (PZAP) ka dënuar Lëvizjen Vetëvendosje me 1,200 euro për shkak të shkeljes së Kodit të Mirësjelljes për Subjektet Politike.

Në vendimin e PZAP-it për ankesën me numër 619/2021, të publikuar të mërkurën, thuhet se pranohet e bazuar ankesa e Lidhjes Demokratike të Kosovës (LDK) ndërsa subjektit politik LVV i shqiptohet dënimi me gjobë në lartësi prej 1,200 euro për shkak të shkeljes së Kodit të Mirësjelljes.

Në arsyetimin e këtij vendimi thuhet se me datë 15 tetor, LDK-ja ka parashtruar ankesë në PZAP me të cilën pretendon se në komunën e Podujevës, po me datë 15 tetor, aktivistët e saj kanë vërejtur se kandidatja e LVV-së për Kuvendin Komunal të Podujevës, Sebastiana Vokrri, ka shpërndarë baner, në hapësirë të palejuar.