Vodhi 25 euro, gjykata në Podujevë i dha dënim me 1 vit burgim dhe 100 euro gjobë

Është dënuar me 1 vit burgim dhe 100 euro gjobë i akuzuari për vjedhje të rëndë, H. H.

Aktgjykimi ndaj tij u shpall të premten, nga gjykatësi i Gjykatës Themelore në Prishtinë, dega në Podujevë, Gazmend Bahtiri.

Sipas aktgjykimit, dënimet ndaj H. do të ekzekutohen pasi aktgjykimi të merr formën e prerë. Kurse në rast të mospagesës së gjobës, gjykatësi tha se dënimi do t’i shndërrohet në dënim me burg, kur 1 ditë burg do të llogaritet 20 euro.

Ndërkaq, ai është liruar nga shpenzimet e procedurës penale, për shkak të gjendjes ekonomike.

Për realizimin e kërkesës pasurore-juridike, i dëmtuari është udhëzuar në kontest të rregullt juridiko-civil.

Vendimi ndaj Hamit Hoxhës u shpall pasi ai e ka pranuar fajësinë në shqyrtimin fillestar të mbajtur më 24 qershor.

Sipas aktakuzës së ngritur më 2 dhjetor 2020, nga Prokuroria Themelore në Prishtinë, H. H. me 31 tetor 2015, rreth orës 19:20, në rrugën “Qëndresa” në Podujevë, në lokalin market “Lavdimi”, pronë e tani të dëmtuarit I. H., me qëllim që me përvetësimin e sendeve të huaja të luajtshme vetes t’i sjellë përfitim të kundërligjshëm pasuror, ka marrë para nga lokali në fjalë.

Këtë thuhet se e ka bërë në atë mënyrë që, me përdorimin e forcës me mjet të përshtatshëm “gërshërë”, ka arritur që të hap derën e lokalit të lartcekur, ka depërtuar brenda dhe nga aty ka arritur të marrë para të gatshme në vlerë 25 euro, me ç’rast të dëmtuarit i ka shkaktuar dëm material.

Me këtë, ai akuzohet se ka kryer veprën penale “vjedhja e rëndë” nga neni 327, paragrafi 1, nën paragrafi 1.1 të KPRK-së, e cila dënohet me gjobë dhe me burgim prej tre (3) deri në shtatë (7) vjet. /BetimipërDrejtësi