NDODH EDHE KJO: Gjykata Themelore në Prishtinë, dega në Podujevë, ka mbetur pa asnjë gjykatës në Divizionin për Kundërvajtje

Gjykata Themelore në Prishtinë, dega në Podujevë, ka mbetur pa asnjë gjykatës në Divizionin për Kundërvajtje, pasi gjykatësi i vetëm i deritanishëm, Xhevat Begolli, ka arritur moshën e pensionimit.

Që nga 18 qershori i këtij viti, kur gjykatësi Begolli ka përfunduar punën në Gjykatën e Podujevës, kanë mbetur të pakryera 1,309 lëndë të natyrës kundërvajtëse. Ato tanimë i janë ndarë në punë dy gjykatësve të lëmisë penale, raporton “Betimi për Drejtësi”.

Gjykatësi mbikëqyrës i kësaj dege, Gazmend Bahtiri, fillimisht ka bërë të ditur se njëherë nuk flitet për ardhjen e një gjykatësi të ri në Divizionin për Kundërvajtje.

I njëjti, për “Betimi për Drejtësi”, ka thënë se është ndjerë nevoja e pashmangshme për të vazhduar punën me lëndët e mbetura, për çka të njëjtat në mënyrë proporcionale janë ndarë mes dy gjykatësve të Divizionit Penal, duke u stërngarkuar këta të fundit me lëndë.

Gjykatësi Bahtiri tha se 655 lëndë i janë ndarë atij, ndërsa 654 lëndë tjera i janë ndarë gjykatësit tjetër, Minir Hoti.

Ndryshe, sipas të dhënave të Këshillit Gjyqësor të Kosovës (KGJK), tashmë i pensionuari Xhevat Begolli ka shërbyer si gjykatës për rreth 40 vite. /BetimipërDrejtësi