Në Podujevë u shënua Dita Olimpike |PAMJE

Me gara sportive në vrapim, ku morën pjesë nxënës të shkollave fillore, në Podujevë për herë të dytë me radhë në organizim të përbashkët të Komitetit Olimpik të Kosovës dhe Komunës së Podujevës u shënua Dita Olimpike Ndërkombëtare.

Në këtë manifestim sportiv, në të cilin morën pjesë fëmijët të cilët kanë lindur në vitin e shpalljes së pavarësisë së Kosovës, mori pjesë edhe kryetari i Komunës së Podujevë, Shpejtim Bulliqi.

Me këtë rast Kryetari Bulliqi ka inkurajuar fëmijët që sa më shumë të merren me aktivitete sportive, i cili ishte edhe mesazhi kryesor i këtij organizimi.

“Si kryetar i Komunës së Podujevës, me kënaqësi kam përkrahur këtë aktivitet, bazuar në qëllimin e tij, e që në essencë është promovimi i sportit tek fëmijët pa dallim dhe inkurajimi i tyre që sa më shumë të merren me sport” tha kryetari Bulliqi

Në ceremoninë ku ishte e pranishme edhe drejtoresha për Kulturë, Rini dhe Sport, Elhame Kutllovci, zyrtarë komunalë, prindër, sportistë dhe shumë qytetarë, kryetari Bulliqi, në emër të qeverisë lokale është zotuar se do të punojë shumë për investime në ndërtimin dhe zgjerimin e hapësirave ku fëmijët mund të zhvillojnë aktivitete sportive.

Ky aktivitetet kishte edhe karakter garues, kurse nxënësit në kategoritë e vajzave dhe djemve, u shpërblyen me medalje.