Emrat e vendosur në rrugët e Podujevës kishin lënë shumë të pakënaqur

Tabela e rrugës me emrin e ri “Pusi i Zanës” i vendosur në vitin 2016 nuk ka qëndruar gjatë në një lagje të fshatit Bajçinë të Podujevës.

Banorët këtu e kishin hequr menjëherë atë, pasi frikësoheshin se mund t’u zyrtarizohej ky “epitet”, që në popull përdoret edhe kur e mallkon dikë ose e përçmon dikë “si i mjerë”.

E kjo është vetëm njëra prej 340 rrugëve që banorët nuk pajtohen me emërtimet e reja që ishin miratuar në Kuvendin Komunal në 2015-n e që vendosja e tabelave kishte filluar një vit më vonë.

“Këtu e kanë vendos emrin pa vet hiç ‘Lagjja e pusave’. Na pusa këtu s’kemi pa kurrë e nuk e di me çfarë qëllimi u mbet kjo këtu. Kur e kanë pru këtë tabelën këtu e kemi pa, neve s’na ka konvenua edhe e kemi hjek. Edhe e kemi ngjit këtë që na ka konvenua. Jemi 15-16 shtëpi ‘Lagjja Salihu’. E nuk e di për çfarë shkaku me na e ngjit ‘Lagjja e pusave’ pa të vet hiç”, tha Hasan Salihu, banor në rrugën “Pusi i Zanës”, fshati Bajçincë.

Tabelat e vendosura nga Komuna nuk kanë mbijetuar gjatë as në fshatin Peran.

“Nuk jena pajtua se kjo rrugë nuk ka lidhje me mullinj, as me haxhillëk, por ia kanë vendos kështu. Kur u kanë mulliri para 50-60 vjetësh në anën tjetër u mbyll. Na këtu kërkojmë prej komune që të na e zgjidh këtë çështje”, tha Selim Halili, banor në rrugën “Mulliri i Hoxhajve”, fshati Peran.

“Këtë rrugë e kanë vendos ‘Shefki Haliti’, s’ka të bëjë me këtë rrugë. Për atë unë jam ai person që nuk e kam lënë me vendos (tabelën v.j.) me këtë emër”, tha Ismet Halili, banor në rrugën “Shefki Haliti” në fshatin Peran.

E me këto ankesa po planifikon të merret qeverisja e re.

“Absolutisht një gjë e domosdoshme për qytetin e Podujevës është emërtimi i rrugëve dhe do të veprojmë me shpejtësi për formimin e komisionit dhe ky komision duhet të fillojë punën dhe të kryejë punën e vet dhe të bëjë emërtimin e rrugëve, normalisht duke vendosur disa kritere të cilat do të nxirren në bazë të Kuvendit Komunal”, deklaroi Fevzi Jetullahu, drejtor i Shërbimeve Publike, Mbrojtje dhe Shpëtim.

Zyrtarët e ish-qeverisjes në Podujevës kishin thënë më herët se pa përfunduar projekti i vendosjes së emrave të rrugëve, sipas listës së parë të miratuar më 2015 dhe po ashtu edhe numrave nëpër shtëpi, nuk do të bëhet shqyrtimi i ankesave të banorëve.© KOHA.