Drejtoria e Inspeksionit: Kemi shqiptuar 10 gjoba për mos respektim të masave anti-COVID në Podujevë

Shtabi Emergjent i Komunës së Podujevës për veprime dhe masa parandaluese e mbrojtëse nga Covid-19 ka mbajtur takim, në të cilin ka diskutuar për gjendjen aktuale me pandeminë, dhe propozimin për lehtësimin e masava të fundit të ndërmarra nga Qeverisë së Kosovës, thuhet në njoftimin e zyrës për Informim e kësaj komune, transmeton PodujevaPRESS.net

Në takimin e sotëm të Shtabit Emergjent, të udhëhequr nga nënkryetarja e Komunës, Marigona Lahu, ajo i informoi anëtarët e shtabit se gjatë takimit online me ministrin e Shëndetësisë Arben Vitia, një ditë më herët kanë diskutuar për lehtësimin e masave të fundit anti-COVID dhe rihapjen e sektorit të gastronomisë dhe bizneseve.

U.D i Drejtorisë së Inspeksionit, Bahri Selimi, tha se gjatë periudhës së ndërmarrjes së masave të reja, inspektorët vazhdimisht kanë qenë në teren së bashku me Policinë. Ai tha se gjatë kësaj periudhe inspektorët kanë shqiptuar 10 gjoba për mos respektim të masave anti-COVID.

Drejtori Selimi tha se masat e fundit kundër  COVID-19 janë respektuar edhe në administratën komunale, duke reduktuar stafin nëpër dikastere – drejtori.

Nënkryetarja Lahu bëri apel tek anëtarët e shtabit që edhe pas lehtësimit të masave kundër coronavirusit, të vazhdojnë me angazhimin e tyre për ruajtjen e shëndetit publik të qytetarëve.