Komuna e Podujevës dhe organizata “Help” ndihmojnë 20 biznese të udhëhequra nga gratë

Komuna e Podujevës dhe Organizata “Help” kanë nënshkruar në marrëveshje bashkëpunimi nëpërmjet së cilës do të ndihmojnë bizneset që udhëhiqen nga gratë.

Në bazë të kësaj marrëveshje, “Help” do të financojë afro 3 mijë euro, ndërsa komuna pak më shumë se 13 mijë euro.

“Marrëveshja e nënshkruar ndërmjet kryetarit Shpejtim Bulliqi dhe drejtoreshës së organizatës “Help”, Shqipe Breznicën ku ishte prezent edhe drejtori i Drejtorisë për Planifikim dhe Zhvillim Ekonomik, Pajtim Balaj, ka për qëllim përkrahjen e grave llapjane, që operojnë në fushën e Efiçencës së Energjisë” thuhet në njoftimin e Zyrës për Marrëdhënie me Publikun dhe Informim të Komunës së Podujevës.

Sipas të njëjtit, kryetari Bulliqi, ka thënë se në bazë të marrëveshjes nga ky projekt do të përfitojnë 20 biznese të udhëhequra nga gratë në Podujevë, me qëllim të rritjes së ndërmarrjes së tyre përmes shfrytëzimit me efiçent të energjisë dhe do të ketë ndikime pozitive në zvogëlimin e kërkesës për energji elektrike dhe shpenzime të ngjashme në sektorin banesor.

“Në kuadër të projektit bizneset do të mbështeten për të filluar ose zhvilluar bizneset e tyre ku do të përfitojnë donacion për pajisje me vlerë mesatare prej 2,649.00 euro; organizim të biznesit dhe trajnimet profesionale sipas nevojave të klientit, si dhe do të bëhet monitorimi i bizneseve të mbështetura”, thuhet tutje në njoftim. “Zhvillimi i aktiviteteve të përmendura do të financohet me shumën totale të kostos direkte prej 52,980 euro (grante dhe trajnime), ndërsa Komuna e Podujevës do të kontribuojë me 25% të shumës totale të investimit që është 13, 245 euro”.