Rezultatet tejet të dobëta të nxënësve në Podujevë nxisin debat në Kuvendin Komunal

Të pakënaqur janë shprehur këshilltarët komunalë të Podujevës me rezultatin e nxënësve të kësaj komune gjatë vitit 2020. Gati gjysma e maturantëve në këtë komunë kanë “ngelur” në Testin e Maturës, ndërkohë që mirë nuk kanë dalë as në përfundimin e gjysmëvjetorit të parë në vitin shkollor 2020/2021.

Sipas një informate të Drejtorisë së Arsimit të paraqitur në mbledhjen e fundit të Kuvendit Komunal shihet që suksesi i nxënësve nga 1-5 në gjysmëvjetorin e parë është 4.32, për klasat 6-9 3.49 ndërsa për nxënësit e shkollave të mesme: Gjimnazi “Aleksandër Xhuvani 3.51, Shkolla Ekonomike “Isa Boletini” 2.54 dhe Shkolla Teknike “Fan S. Noli” 2.14. Duke e komentuar këtë informatë, këshilltari i partisë në pushtet Vetëvendosje, Ragip Fetahu, e ka konsideruar shqetësues rezultatin e maturantëve.

“Nga 1450 maturantë (2020 v.j.), Testin e Maturës nuk e kanë kaluar 614 apo rreth 43%. Ndërsa në afatin e dytë nga 603 nxënës testin e kanë kaluar vetëm 57. 22 %. Po t’i analizojmë rezultatet e dy afateve të testit të maturës, rezulton se komuna jonë është rreth 9% nën nivelin nacional. Këto janë rezultate jo të mira, që kërkojnë një analizë të brendshme për të përmirësuar këtë rezultat”, është shprehur Fetahu.

Por, këto kritika nuk i ka adresuar në pushtetin e tanishëm të Podujevës, që ka marrë detyrën në muajin dhjetor të vitit të kaluar. Këshilltari i Vetëvendosjes ka thënë se problemet në arsim janë të akumuluara ndër vite gjatë periudhave të ndryshme kohore si rezultat i shumë faktorëve. Ai ka thënë po ashtu se problem tjetër i Podujevës është largimi i nxënësve në qytete të tjera.

Edhe këshilltari nga radhët e PDK-së, Pajtim Hodolli, ka folur për rezultatin jo të mirë të maturantëve.

“Tani kemi gjeneratën e maturantëve që do të dalin nga Podujeva, e që do të ballafaqohen me konkurrencën në nivel vendi. Unë shikova raportet e DKA-së për vitin e kaluar dhe ajo çfarë vërejta tek SHMT. ‘Fan S. Noli’ ishte shumë shqetësuese. Vetëm 27% e maturantëve e kanë kaluar testin e maturës në afatin e parë, kurse 73% kanë rënë nga provimi. Çfarë keni bërë ju në këtë kohë të pandemisë që këta nxënës të jenë konkurrent me moshatarët e tyre nga Komunat e tjera?”, ka pyetur Hodolli.

Këshilltari i PDK-së ka pasur vërejte edhe për kushtet teknike në objekte shkollore për persona me nevoja të veçanta. Ai është ankuar edhe për mosudhëzimin e nxënësve se si të veprohet në raste emergjente.

Shefi i Grupit të këshilltarëve të PDK-së, Fatmir Rudari, ka pyetur se çfarë është bërë me drejtorët e shkollave që ishin zgjedhur nga ish-pushteti. Ndërsa, bashkëpartiaku i tij, Rafet Llapashtica, e ka quajtur prezantimin si jokredibil dhe me mungesë të specifikimeve.

Edhe këshilltari i VV-së, Haki Rudari, ka thënë se në këtë informatë mungojnë sa nxënës dhe mësimdhënës kanë qenë me Covid-19.

Në anën tjetër, drejtori për Arsim, Avni Fetahu, ka thënë se çështja e sigurisë në shkolla është e rregulluar me ligj dhe se e kanë ndarë një buxhet për këtë çështje.

“Ne ata drejtorë edhe pse janë shkarkuar i kemi emëruar ushtrues detyre, jo për hakmarrje, por ish-pushteti i ka shkelur afatet për zgjedhjen e tyre. Ne i kemi filluar procedurat e konkursit për drejtorët e shkollave. Te dokumentacioni zyrtar, ish-drejtori është arsyetuar se ka punuar në kompjuter personal dhe nuk kam pasur të dhëna, Por, të gjitha këto të dhëna që janë paraqitur i kemi mbledh në terren. Në fshatin Shajkofc është hapur konkursi dhe do të zgjidhet mësimdhënësi i edukatës fizike”, ka theksuar Avni Fetahu, si përgjigje ndaj pyetjeve të asamblistëve.

Ndërkohë, sa i përket rasteve në shkolla me COVID-19, ka thënë se deri tash 107 mësimdhënës kanë rezultuar pozitivë, ndërsa aktualisht janë 7 raste aktive. Mbi 100 është edhe numri i nxënësve që kanë qenë pozitivë me koronavirus. Fetahu ka thënë se janë të përkushtuar që të hapin çerdhe me bazë në komunitet