Njoftim me shumë rëndësi nga Komuna e Podujevës

Nga pronarët e bizneseve, tregtarët dhe zejtarët kërkohet të mos ekspozojnë mallrat në hapësira publike, kështu thuhet në një njoftim për publikun nga komuna e Podujevës, transmeton PodujevaPRESS.net

Kryetari i Komunës së Podujevës, Shpejtim Bulliqi, bashkë me anëtarët e Ekzekutivit, ka zhvilluar sot një takim me pronarë të bizneseve, dyqaneve dhe zejtarë të Podujevës.

Gjatë takimit të sotëm me pronarë të biznesve, dyqaneve dhe zejtarët u bisedua për respektimin e ligjit dhe rregulloreve në fuqi, që kanë të bëjnë me operimin e veprimtarive tregtare dhe shërbyese.

Në takim u potencua dukuria e ekspozimit të mallrave në hapësira publike, sidomos në trotuare gjë që pengon qarkullimin e qytetarëve.

Kryetari Bulliqi tha se beson se bizneset, tregtarët dhe zejtarët kanë vullnetin ta ndihmojnë ekzekutivin dhe administratën komunale në zbatimin e ligjit, në mënyrë që të mos ekspozohen mallrat në trotuare dhe hapësira të tjera publike.

“Interesi ynë është që ju të zhvilloni suksesshëm afarizimin tuaj, që përveç se ju përmbush juve financiarisht, zbut edhe papunësinë.

Qëllimi i këtij takimi është të gjejmë mirëkuptim, që ju të zhvilloni veprimtarinë tuaj, por të mos pengoni qarkullimin në trotuare, rrugë dhe hapësira të tjera publike”, tha kryetari Bulliqi, duke potencuar se Ekzekutivi do të jetë gjithmonë në dispozicion të shqyrtojë kërkesat e tyre, por gjithmonë duke respektuar ligjin.

Drejtori i Inspeksionit, Ajet Potera, tha se duke ekspozuar mallrat në hapësira publike prishet edhe imazhi i qytetit. Ai gjithashtu potencoi se disa veprimtari nuk respektojnë as kushtet higjienike e sanitare.

Në takimin e sotëm pronarët e bizneseve dhe tregtarët kërkuan që të ndryshohet Rregullorja për orarin e punës, duke kërkuar t’iu mundësohet puna edhe të dielave.

Drejtori i Zhvillimit Ekonomik, Pajtim Balaj, tha se janë duke punuar në këtë drejtim dhe pritet që në njërën nga mbledhjet e ardhshme të Kuvendit ta nxjerrin këtë rregullore, për ndryshim të orarit të punës.