Ndërrimi i pushtetit në Podujevë pritet t’i hapë rrugë miratimit të një dokumenti komunal

Ndërrimi i roleve të LDK-së dhe LVV-së në pushtetin komunal të Podujevës pritet t’i hapë rrugë miratimit të Propozim-rregullores për organizimin dhe bashkëpunimin e komunës me fshatrat, vendbanimet dhe lagjet urbane.

Ky dokument komunal i kishte kaluar të gjitha procedurat në vitin 2018, por asnjëherë nuk ka shkuar për miratim në Kuvendin Komunal. Ish-komunarët e Podujevës akuzoheshin nga VV e PDK se qëllimisht dhe jashtëligjshëm po e bllokojnë miratimin e kësaj rregulloreje për të mbajtur në këshillat e fshatrave njerëzit e LDK-së.

Ndërkohë në muajin shtator të vitit të kaluar, edhe pse ishte propozuar që të vihej sërish në diskutim publik, pas disa ndryshimeve që kishte pësuar, për shkak të pandemisë, mbajtja e debateve ishte suspenduar pa ndonjë afat. Ndërkohë Bajram Ajeti, shef i kabinetit të kryetarit të Podujevës, Shpejtim Bulliqi, thotë se deri në muajin mars këtë dokument do ta dërgojnë në Kuvend për miratim.

“Rregullorja për rregullimin dhe funksionalizimin e këshillave të fshatrave e lagjeve urbane është e domosdoshme, e cila është obligim që del edhe nga baza ligjore, qoftë nga Ligji për vetëqeverisje lokale, qoftë nga Statuti, por edhe udhëzimet e veçanta të cilat janë të Ministrisë. E dini që dy herë rregullorja ka dalë para Asamblesë. Ne gjithherë e kemi dhënë aprovimin. Mirëpo në herën e parë kur është aprovuar këta (LDK) nuk ishin të gatshëm dhe ndërkohë edhe e vonuan, edhe pasi përfundoi debati”, ka thënë Bajram Ajeti.

Shefi i kabinetit të kryetarit të Komunës së Podujevës thotë se në 2019 kishte dalë një udhëzim administrativ, në bazë të të cilit kërkohej që rregulloret ekzistuese (që Podujeva nuk kishte fare) të plotësoheshin dhe ndryshoheshin sipas udhëzimit të ri.

“Ka kaluar edhe kjo në Asamblenë Komunale dhe mbeti që të mbahen tri debate. Nuk kemi raport nëse i kanë mbajtur apo jo. Mirëpo ne në Planin e punës së Kuvendit mendojmë se më së largu deri në mars të vihet para Kuvendit Komunal për aprovim. Tash, normal që kemi pak skepticizëm, sepse LDK-ja nuk është e gatshme. Unë mendoj se nuk ishte dashur që të ketë pengesa, sepse është obligim ligjor. Por ne do ta vëmë për aprovim, sepse është e domosdoshme, sepse nuk mund të kemi njerëz që në mënyrë arbitrare të jetë përfaqësues i fshatit kur ajo është kundërligjore”, është shprehur Ajeti.

Ai ka thënë se nëse nuk janë mbajtur debatet për këtë propozim-rregullore, atëherë do të gjejnë mënyra që ato të mbahen para se ky dokument të shkojë për miratim në Kuvend.

“Sepse vërtet është një rregullore që u duhet qytetarëve, sepse është në interesin e tyre për të lidhur marrëveshje me komunën për kompetencat vetjake që i ka komuna, por edhe rolit që këshillat e fshatrave i kanë”.

Bajram Ajeti ka thënë se nuk do të jetë pengesë as pagesa që sipas Udhëzimit Administrativ 02/2019 është paraparë për kryetarët e këshillave në bazë të mbledhjeve që do t’i mbajnë. Ndërsa, sa i përket propozimit që kryetarët të mos jenë njerëz nga partitë politike, Ajeti thotë se në parti mund të jetë secili qytetar.

“Por, nuk mund të jenë ata që merren me aktivitet politik, qoftë anëtarë të kryesive, nëndegëve, pikave apo sido që të quhen”.

Por Vetëvendosja nuk e ka shumicën në Kuvend për ta miratuar këtë propozim-rregullore. Megjithatë, shefi i Grupit të këshilltarëve të PDK-së, Fatmir Rudari, ka thënë se do të jetë pro këtij dokumenti.

“Është e vërtetë që ne si këshilltarë e kemi ngritur dhe kemi kërkuar nga ekzekutivi i komunës që të zbatohet rregullorja, e cila i rregullon këshillat e fshatrave dhe pas disa insistimesh tona më datën 9 shtator kishte ardhur në Kuvend që të marrë miratimin për të dalë në dëgjim publik. Pasi kishte marrë mbështetjen nga Kuvendi, Ekzekutivi ishte arsyetuar se për shkak të pandemisë dhe rregullave që ishin në fuqi në atë kohë nuk guxon që të organizojë dëgjime publike. Por kjo ishte vetëm një arsye se Ekzekutivi në të njëjtën kohë ka pasur organizime edhe më të mëdha në kundërshtim me rregullat anti-Covid”, ka thënë Fatmir Rudari. “Por si duket kjo ishte vetëm një arsye që kjo çështje mos të ecë përpara dhe t’i shfrytëzojë të zgjedhurit politikë, kryetarët e nëndegëve nga LDK-ja, që të jenë nëpër ato këshilla. Ne si subjekt politik në Kuvend nuk do të ndalemi dhe shpresojmë që pas ndërrimit të pushtetit Ekzekutivi i ri do të ketë vullnet që këtë çështje ta shtyjë përpara. Në rast se ata do të kenë vullnet dhe do ta sjellin me ato vërejtje tona, normal që do ta përkrahim që kjo çështje të rregullohet në bazë të Udhëzimit Administrativ që është në fuqi”.

Ky dokument rregullon çështjen e përgjegjësive të këshillave të fshatrave e lagjeve, përbërjen e tyre, rolin, detyrat dhe aktivitetet, bashkëpunimin me komunën, konsultimet dhe marrëveshjet me komunën, financimin e aktiviteteve, kompensimin e kryetarëve të këshillave, etj.