Telashe mes Vjosa Osmanit dhe Vetëvendosjes, U.D. e presidentes refuzon të kandidojë nën logon e VV

Tashmë kur dita e zgjedhjeve po afrohet, partitë politike kanë intensifikuar bisedat për arritjen e koalicioneve parazgjedhore, raporton Gazeta Online Veriu.info.

Sonte në ora 18:00 ka kaluar afati për aplikim për certifikim të koalicioneve parazgjedhore në KQZ, ku kanë aplikuar vetëm dy koalicione parazgjedhore, koalicioni VAKAT dhe ZAJENO.

Tema më e diskutuar kohët e fundit ka qenë koalicioni i mundshëm mes Lëvizjes Vetëvendosje dhe Vjosa Osmanit e cila përfundimisht ka ndarë rrugët me partinë e saj, LDK.

Veriu.info mëson nga burimet e saj se ka pasur mospajtime të thella mes Vjosa Osmani dhe Vetëvendosjes për arritjen e një koalicioni parazgjedhor pasi, Osmani nuk po pajtohet që të kandidojë në këto zgjedhje nën logon e VV.

Po ashtu sipas këtij burimi në mospajtime ka qenë e përfshirë edhe Mimoza Kusari, e cila bashkë me Osmanin kanë insistuar që të kandidojnë bashkë me Vetëvendosjen nën një emër të përbashkët të koalicionit.

Tashmë afatet kohore për koalicione parazgjedhore kanë kaluar, vecse mund të ndodh që Osmani dhe Kusari të bëhen pjesë e listës së VV-së, anipse deri tani mësohet se Osmani nuk ka gatishmëri të hyjë në zgjedhje nën logon e partisë së Albin Kurtit.