Nënkryetarja e Komunës së Podujevës, Lahu dhe drejtorët Hasani e Jetullahu vizituan dy fshatra të përfshira nga vërshimet

Nënkryetarja e Komunës së Podujevës, Marigona Lahu, bashkë me drejtorin e Urbanizmit, Bujar Hasani dhe drejtorin e Shërbimeve Publike, Fevzi Jetullahu, kanë vizituar sot fshatrat Tërnavë dhe Siboc, të goditura nga vërshimet.

Gjatë vizitës në fshatrat e goditura nga vërshimet nënkryetarja Lahu dhe anëtarët e ekzekutivit komunal, Hasani dhe Jetullahu, kanë parë nga afër gjendjen e krijuar nga vërshimet.

Në dy këto fshatra prurjet e ujit, që kanë dalë nga shtretërit e lumenjve kanë vërshuar sipërfaqe të mëdha të tokave bujqësore, por edhe kanë depërtuar në oborre dhe objekte banimi, duke shkaktuar dëme të konsiderueshëm edhe në amvisëritë familjare.

Përkundër dëmeve të shkaktuara, nënkryetarja Lahu tha se është fat i mirë që vërshimet nuk kanë shkaktuar pasoja në njerëz.

Ndërsa, Komisioni Komunal për vlerësimin e dëmeve tashmë ka dalë në teren dhe është duke bërë evidentimin dhe vlerësimin e dëmeve të shkaktuara nga vërshimet.

Për dallim nga një ditë më parë kur ishin vërshuar shumë zona, gjatë ditës së sotme gjendja paraqitet më e mirë, kurse uji është tërhequr në shtretërit e lumenjve.