Banorët në një fshat të Podujevës ndihen të rrezikuar nga trafoja elektrike në hyrje të oborrit

Ruzhdi Ejupi nga fshati Sekiraçë i Podujevës ndihet i rrezikuar nga trafoja që është e vendosur ngjitur me dyert e oborrit të tij. Ndonëse ka kërkuar disa herë nga zyrtarët e “KEDS”-it që t’ia heqin nga prona e tij, deri tash kjo nuk ka ndodhur.

Ky banor, që nuk deshi të flasë para kamerës, i ka thënë KOHËS se trafoja ishte vendosur 2-3 vjet pas luftës nga KEK-u. Atëkohë thotë se zyrtarët e KEK-ut kishin kërkuar nga ai që t’ia lejojë vendosjen e kësaj trafoje për një kohë të shkurtër, derisa të bëhej një projekt i ri, i cili do të përfshinte futjen e kabllove në tokë dhe pastaj do të hiqej edhe trafoja. Sivjet zyrtarët e “KEDS”-it kanë filluar vendosjen e rrjetit të ri në fshat dhe Ruzhdi Ejupi ka kërkuar nga ta që ta zhvendosin këtë trafo. Por KEDS-i ka kërkuar nga Ruzhdi Ejupi që ky t’ia gjejë vendin tjetër trafos.

“2-3 vjet pas luftës e ka vendosur KEK-u këtë trafo. Kanë ardhur KEK-u edhe m’u kanë lutur me vendosë për një kohë të shkurtë se më thanë që do të vijë projekt i ri, do të vendosen kabllot për dhe edhe do të hiqet trafoja prej këtu. Edhe i lashë. Kur ka filluar sivjet “KEDS”-i të punojë në rrjet, kam kërkuar që ta heqin trafon nga prona ime. E kam marrë kadastrin edhe trafoja është në pronën time. Ata ma kanë kthye një përgjigje: ti me sigurua vendin, punët teknike i kryejmë ne. Gojarisht djalit i kanë thanë që me i pagua edhe shpenzimet e zhvendosjes së trafos”, thotë Ejupi.

Më 30.10.2020 “KEDS”-i e ka lëshuar një informatë lidhur me kërkesën e këtij banori.

“Për dislokim të trafo-shtyllës së cekur më lart konsumatori duhet ta sigurojë vendin e ri për dislokim, ky vend duhet të jetë afër rrugës dhe të ketë qasje 24 h për punëtorët e KEDS-it. Pas sigurimit të vendit nga parashtruesi i kërkesës ne mund ta përgatisim zgjidhjen teknike”, thuhet në këtë informatë të KEDS-it për Ruzhdi Ejupin.

Ai thotë se kjo trafo njëherë edhe kishte marrë flakë.

“Këtu e kam hyrjen në shpi edhe këqyri me ndërtua shtëpi këtu e trafoja është në derë. Ajo është e rrezikshme. Njëherë edhe u pat djegë. Sivjet KEDS-i e ka zhvendosë një trafo edhe pse nuk ka qenë në pronë private. Ndërsa kjo që është në pronë private na pengon, është rrezik me pasë në hyrje edhe nuk e kanë hequr. Unë nuk mundem me ia gjetë vendin, se nuk është kompetencë e imja. Ata duhet me gjetë zgjidhjen”, ka thënë ai.

KOHA ka kërkuar përgjigje nga “KEDS”-i për këtë rast, por zyrtarët e tij nuk kanë kthyer përgjigje gjatë ditës së premte.

Ndërkohë Ruzhdi Ejupi thotë se në rast se “KEDS”-i vazhdon të refuzojë heqjen e kësaj trafoje, ai do ta padisë atë dhe nuk do të lejojë ta rrezikojë familjen e tij.