Raportimi i PodujevaPRESS del të jetë i sakt, Rudari shkarkon dy drejtora në Komunën e Podujevës

Para disa ditësh portali PodujevaPRESS ka raportuar se brenda pak ditësh do të ketë ndryshime në ekzekutivin e Podjevës.

Ushtruesi i detyrës së kryetarit të Komunës së Podujevës, Nexhmi Rudari, i ka shkarkuar dy drejtorë komunalë, atë për Planifikim Urban dhe Mbrojtje të Mjedisit, Hamdi Jahën dhe drejtorin për Shëndetësi dhe Mirëqenie Sociale, Zaim Thaçi.

Podujevë, Komuna anulon konkursin për infermier shofer të autoambulancës

Arsyeja e shkarkimit të dy vartësve të tij, është njoftuar të jetë performanca e dobët e tyre. Vetë Rudari nuk e ka hapur telefoni, ndërsa në një përgjigje të Zyrës për informim të Komunës është mohuar se dy ish-drejtorët janë shkarkuar për shkak se nuk ishin angazhuar mjaftueshëm në fushatë për zgjedhjet e jashtëzakonshme për kryetar të Podujevës, në të cilën garë është edhe Nexhmi Rudari.

“Sot u janë dorëzuar vendimet për lirim nga pozita e drejtorit dy drejtorëve, atij Planifikim Urban dhe Mbrojtje të Mjedisit, z. Hamdi Jaha dhe drejtorit të Shëndetësisë dhe Mirëqenies Sociale, z. Zaim Thaçi. Lirimi nga pozita e drejtorit ka të bëjë me performancën e tyre, si dhe angazhimet e nënkryetarit Rudari për rritje të dinamikës në realizimin e projekteve infrastrukturore dhe përmirësim të shërbimeve në fushën e shëndetësisë̈”, thuhet në përgjigjen e Zyrës për informim.

Sipas të njëjtës, zëvendësimi i dy ish-drejtorëve do të bëhet në konsultim të nënkryetarit Rudari me subjektin politik.

“Ndërsa për momentin detyrat në kuadër të drejtorive përkatëse do të kryhen nga zyrtarët e këtyre dy drejtorive”.

KOHA ka kontaktuar Zaim Thaçin e Hamdi Jahën, por i pari nuk e ka hapur telefonin, ndërsa i dytë nuk ka qenë i gatshëm sot të deklarohet për këtë. Ka thënë se po pret deri nesër dhe pastaj do të flasë.