Flasin nga Ministria e Arsimit, tregojnë se a do të kthehet mësimi i tërësishëm online në shkolla

Në Kosovë deri më tani janë infektuar me Covid-19, 56 mësimdhënës dhe 25 nxënës.

Gazeta Blic për çështjen e mësimit në shkollat e Kosovës ka biseduar me zëdhënësen e Ministrisë së Arsimit dhe Shkencës, Diellza Kukaj e cila thotë se MASH ka zhvilluar një modul për regjistrimin e rasteve të dyshuara dhe të konfirmuara me Covid-19.

“Deri më tani nga komunat raportuese kemi 56 mësimdhënës dhe 25 nxënës të infektuar me COVID- 19.  Sa i përket raportimit te rasteve me covid nga shkollat, Ministria e Arsimit dhe Shkencës ka zhvilluar një modul të ri për regjistrim të rasteve të dyshuara dhe të konfirmuara me COVID-19 të nxënësve dhe personelit arsimor”, deklaroi ajo.

Kukaj tregon se nxënësit e prekur nga Covid-19 po mbajnë mësimin në distancë që të mos humbasin mësimin.

“Raportimin për formën e organizimit të mësimit sipas Udhëzuesit të MASh për organizimin e mësimit në kushte të pandemisë, përkatësisht skenarëve A, B dhe C. Këtë aplikacion MASh e ka zhvilluar me qëllim të krijimit të lehtësirave në marrjen e informatave nga terreni për situatën pandemike në shkolla në kohë reale. Nxënësit të cilët janë duke u përballur me COVID-19 kanë kaluar në skenarin C (mësim në distancë) në mënyrë që të mos humbin mësimin”, shkroi Kukaj.

Kukaj pasi u pyet nga Gazeta Blic se a mund të kthehet mësimi online në shkolla pas paralajmërimeve se do të shtrëngohen masat anti-Covid, deklaroi se shkollat nuk do të mbyllen.

“Shkollat nuk mbyllen por mësimi po organizohet konform udhëzuesit të përgjithshëm sipas tre skenarëve bazuar në gjendjen me virus ( psh në rast të paraqitjeve te rasteve me virus organizohet mësimi sipas skenarit C)”, deklaroi ajo.

Ajo tregon se mësimi po organizohet konform udhëzuesit të përgjithshëm, me tre skenare bazuar në gjendjen me Covid-19.

“Udhëzimi për reagim parasheh ndërrimin e kenarëve (A->B ose B->C) në bazë të numrit të personave të infektuar në sistemin arsimor”, thotë Kukaj.

Nëse mësimdhënësi del pozitiv me Covid-19, të gjithë nxënësit e klasës përkatëse dhe kontaktet e mësimdhënësit kalojnë në mësim online.

Në secilin rast kur një mësimdhënës tregon simptoma të ngjashme me Covid-19, menaxhmenti i shkollës duhet të informojë DKA-në/QKMFnë përkatëse, dhe DKA duhet të: gjejë zëvendësim të përkohëshëm brenda stafit të shkollës menjëherë, të sigurojë testimin për covid – 19 në afatin sa më të shkurtë për mësimdhënësin dhe në rast të rezultatit pozitiv – të gjejë zëvendësim nga mësimdhënësit e sshkollës ose nga lista e mësimdhënësve rezervë në komunë. Në këtë rast të gjithë nxënësit e klasës përkatëse dhe kontaktet e mësimdhënësit kalojnë në mësim online”, deklaroi Kukaj