PODUJEVË: Filloi ndërtimi i shkollës së re në Balloc

Në fshatin Balloc sot filloi ndërtimi i objektit të ri të shkollës. Në ceremoninë e organizuar me këtë rast ku merrnin pjesë zyrtarë komunalë, personeli arsimor i shkollës, veteranë të arsimit, nxënës dhe banorë të fshatit, nënkryetari i Komunës, Nexhmi Rudari ka vendosur gurthemelin e shkollës së re, njofton zyra për informim e kësaj komune.

Me këtë rast nënkryetari Rudari tha ky objekt po ndërtohet bazuar në nevojën e këtij fshati për shkollë të re.

“Ne jemi këtu gjithmonë të përmbushim zotimet dhe nevojat e nxënësve tanë.

Shkolla po ndërtohet sipas standarteve të larta dhe do të plotësojë kushtet për nxënësit dhe mësimdhënësit që të zhvillojnë procesin mësimor në një objekt bashkëkohor”, tha nënkryetari Rudari.

Më tej nënkryetari Rudari tha se ndërtimi i shkollës në Balloc është projekt i Komunës së Podujevës dhe financohet nga buxheti i taksapaguesve llapjanë.

Nënkryetari Rudari dhe drejtori i Arsimit, Agim Blakçori uruan nxënësit, prindërit, personelin arsimor dhe të gjithë banorët e fshatit për objektin e ri shkollor që do ta kenë së shpejti.