Mbajtja e zgjedhjeve në Podujevë në duar të këtyre institucioneve

Partitë politike, kandidatët garues për të parin e Komunës së Podujevës dhe Komisioni Zgjedhor i Zgjedhjeve janë duke pritur vetëm vlerësimin e Institutit Kombëtar të Shëndetësisë Publike të Kosovës për mbajtjen e zgjedhjeve të jashtëzakonshme në këtë komunë.

Se KQZ është gati për organizimin e zgjedhjeve në Podujevë e ka konfirmuar për klankosova.tv edhe zëdhënësi i këtij institucioni Valmir Elezi.

“Komisioni Qendror i Zgjedhjeve edhe më herët e ka bërë të qartë qëndrimin se do të përmbushë obligimin kushtetues për organizimin e zgjedhjeve kurdo që i kërkohet, ashtu siç kemi bërë gjithmonë”, është shprehur ai.

“Lidhur me gjendjen aktuale në të cilën ndodhemi për shkak të pandemisë, ne si KQZ nuk mund të japim përgjigje për aspektet që kanë të bëjnë me shëndetin e qytetarëve pasi janë institucionet tjera përkatëse dhe profesionale që e kanë fushë të përgjegjësisë së tyre”.

Rreth çështjes se pse Ministria e Shëndetësisë dhe IKSHPK nuk po e japin dritën jeshile për mbajtjen e zgjedhjeve në këtë komunë, zëdhënësi i Ministrisë së Shëndetësisë, Faik Hoti, ka thënë se nuk kanë pranuar ndonjë kërkesë për këtë.

“Kur MSh e IKSHPK të marrin ndonjë kërkesë për të dhënë rekomandim rreth kësaj çështje, e shtrojnë për vlerësim”, ka thënë Hoti për klankosova.tv.

Për organizimin sa më të shpejtë të votimeve në Podujevë janë edhe vetë kandidatet për kryetar të kësaj komune të cilët shprehen të gatshëm për rifillimin e garës për të parin e komunës, raporton Klan Kosova.

Nexhmi Rudari i cili është ushtrues detyre i kryetarit të Podujevës, njëherit edhe kandidat për kryetar të kësaj komune nga radhët e LDK-së, ka thënë se edhe qysh në kohën kur janë anuluar zgjedhjet ai dhe subjekti i tij kanë qenë të gatshëm për garën e të parit të komunës.

“Ne kemi qenë të gatshëm edhe si subjekt edhe si kandidat qysh në kohën kur janë anuluar zgjedhjet. Tash është në vlerësim të IKSHPK-së dhe Ministrisë së Shëndetësisë që ta bëjnë vlerësimin se a kanë pushuar se ekzistuari rrethanat që kanë shtyr zgjedhjet, nëse kanë pushuar ato rrethana ne jemi të gatshëm”, ka thënë Rudari për klankosova.tv

Sipas tij, tani duhet të bëhet një vlerësim profesional nga institucionet përkatëse rreth situatës me COVID-19 në këtë qytet dhe se ai dhe partia e tij janë të gatshëm që zgjedhjet të mbahen qysh në javën e ardhshme.

“Gjendja me COVID-19 ka ardhur duke u përkeqësuar, duke pasur humbje jete dhe infektime të shumta, fatmirësisht në Podujevë jemi me 83 raste aktive, tani duhet të bëhet një vlerësim profesional nga institucionet përkatëse, dhe siç e ceka edhe me lartë edhe unë si kandidat por edhe si subjekt politik jemi të gatshëm qysh javën e ardhshme të mbahen zgjedhjet.”

Pas pezullimit prej gjashtë të procesit të organizimit të votimeve atje, kandidati nga Lëvizja Vetëvendosje, Shpejtim Bulliqi, ka thënë se tash është koha për zhbllokimin e këtij procesi dhe se KQZ mund t’i organizojë zgjedhjet pa ndonjë telashe të madhe.

“Sot në Kosovë ka filluar jeta të normalizohet përkundër situatës me pandeminë, të gjitha institucionet dhe bizneset janë duke punuar, duke respektuar rekomandimet e institucioneve shëndetësore dhe duke ruajtur shëndetin e qytetarëve, KQZ-ja mund t’i organizojë zgjedhjet pa ndonjë telashe të madhe”, ka thënë Bulliqi për klankosova.tv

Bulliqi ka potencuar se Kosova duhet të ndjekë modelet e shteteve të Ballkanit që kanë mbajtur zgjedhje në kohë pandemie në mënyrë që edhe në komunën e Podujevës të mbahen votimet  pasi sipas tij qytetarët e kësaj komune janë duke u privuar nga e drejta për ta zgjedhur kryetarin.

“Qytetarët tanë janë të privuar për të zgjedhur kryetarin e tyre, tash është koha të zhbllokohet ky proces dhe qytetarët le të vendosin se kë e duan në qeverisje sepse kjo situatë ka krijuar edhe mërzitje dhe de-motivim të tyre andaj duhet të kthehemi te sovrani dhe të legjitimohet ai që ka programin më të mirë për ta zhvilluar komunën.”

Kandidati i PDK-së për drejtimin e Komunës së Podujevës, Naim Fetahu, ka thënë se  janë në pritje të një vlerësimi nga institucionet kompetente për caktimin e datës së zgjedhjeve.

“Ju e dini se zgjedhjet ne Podujevë janë ndërprerë për shkak të pandemisë dhe ne jemi pajtuar se shëndeti i qytetarëve është mbi te gjitha. Ne jemi duke pritur vlerësimin e institucioneve kompetente për caktimin e datës se zgjedhjeve, kurdo që ato vendosin institucionet, ne jemi te gatshëm te marrim pjesë në zgjedhje”, ka thënë Fetahu për klankosova.tv

Votimi i Qeverisë “Kurti” më 3 shkurt të këtij viti dhe zgjedhja e Agim Veliut si ministër i Punëve të Brendshme, bëri që komuna të cilën e udhëhiqte Veliu, Podujeva, të shkojë në zgjedhje të jashtëzakonshme për kryetar komune.

Në Podujevë fushata nga partitë politike për të parin e komunës filloi me 3 mars dhe planifikohej që të përfundonte më 13 mars.

Po në të njëjtën datë (më 13 mars), Kosova regjistroi  dy rastet e para me COVID-19, gjë që çoi në anulimin e zgjedhjeve në këtë komunë pa ndonjë afat të caktuar.