Amerika do t’i tërheqë 12.000 ushtarë nga Gjermania

SHBA-ja do t’i kthejë nga Gjermania në shtëpi rreth 6.400 ushtarë, derisa 5.600 tjerë do t’i zhvendosë nëpër shtetet tjera të Evropës, kanë bërë të ditur të mërkurën zyrtarët kryesorë amerikanë të Departamentit të Mbrojtjes, duke dhënë detaje të një plani të Pentagonit që ka një kosto prej miliarda dollarësh dhe për finalizimin e të cilit do të duhen shumë vjet.

Ky vendim e përmbush dëshirën e shprehur të presidentit Donald Trump për t’i tërhequr trupat nga Gjermania, shtetin të cilin presidenti amerikan e ka akuzuar për dështim në shpenzimin e mjaftueshëm për mbrojtje, raporton AP.

Një numër i madh forcash do të sistemohen në Itali, derisa Komanda amerikane për Evropën dhe Komanda për Operacione Speciale mund të kalojë nga Stuttgarti në Belgjikë.

Sekretari amerikan i Mbrojtjes ka thënë se disa lëvizje do të fillojnë brenda disa muajsh dhe se në Gjermani do të mbesin 24.000 ushtarë.

Ai ka thënë se ndonëse vendimi ishte “përshpejtuar” përmes vendimeve të Trumpit, ato në të njëjtën kohë përkojnë me synimet më të mëdha strategjike për sprapsjen e Rusisë.

Trumpi megjithatë e ka thënë qartë të mërkurën në Shtëpinë e Bardhë: “Po e reduktojmë numrin e trupave, pasi që nuk po i paguajnë faturat e tyre. Shumë e thjeshtë është”.