Podujeva kërkon që dëmet e shkaktuara në bujqësi nga vërshimet të kompensohen nga Qeveria

Kuvendi i Komunës të Podujevës, ka mbajtur mbledhje të jashtëzakonshme, ku ka diskutuar për dëmet e shkaktuara në kulturat bujqësore nga vërshimet dhe breshëri, transmeton IndeksOnline.

Nga ajo që është kuptuar nga kjo mbledhje fshatraty më të prekura të kësaj komune janë Sfeçla, Siboci, Konushefci, Burica, Penuha, Lupçi dhe fshatrat e tjera nga kjo anë,  ndërsa komisioni është në teren dhe në të njejtën kohë u është bërë thirrje fermerëve që t’i paraqesin dëmet.

Tutje në komunikatën e lëshuar nga kjo komunë bëhet e  ditur se pas diskutimeve Kuvendi ka miratuar dy propozimet e drejtorit të DBPZHR, Vezir Januzi që: të gjitha dëmet e shkaktuara të adresohen në MBPZHR me qëllim të kompensimit të tyre dhe;  në buxhetin e Komunës për vitin 2021të planifikohet buxhet për kompensimin e dëmeve, në formë të subvencioneve.

Njoftimi i plotë:

Kuvendi i Komunës të Podujevës, në mbledhjen e jashtëzakonshme, ka diskutuar për dëmet e shkaktuara në kulturat bujqësore nga vërshimet dhe breshëri

Kuvendi i Komunës së Podujevës ka mbajtur mbledhjen e jashtëzakonshme, të cilën e udhëhoqi  kryesuesi Fatmir Gashi, e ku ishin të pranishëm drejtorët e drejtorive.

Një informatë për situatën dhe dëmet bujqësore të shkaktuara nga vërshimet dhe breshëri e bëri drejtori i Bujqësisë, Pylltarisë dhe Zhvillimit Rural, Vezir Januzi, cili tha se që nga fillimi i pranverës kanë filluar të paraqiten raste të dëmeve të shkaktuara nga breshëri, erërat e forta, vërshimet dhe ngricat pranverore.

“Komisioni lokal për vlerësimin e dëmeve, i ngritur nga Komuna e Podujevës ka dalë vazhdimisht në teren dhe ka vlerësuar dëmet e shkaktuara. Kryesisht dëme janë shkaktuar në infrastrukturë, ekonomi familjare dhe bujqësi. Totali i këtyre dëmeve të paraqitura, pa rastet e fundit është 316,461 euro. Listat janë dërguar në MBPZHR dhe të njejtat sipas vendimeve të ministrisë po kompensohen”, tha drejtori Januzi

Duke iu referuar situatës së fundit drejtori Januzi tha se fshatrat më të goditura janë Sfeçla, Siboci, Konushefci, Burica, Penuha, Lupçi dhe fshatrat e tjera nga kjo anë, komisioni është në teren dhe në të njejtën kohë u është bërë thirrje fermerëve fermerëve që t’i paraqesin dëmet.

Në lidhje me dëmet e shkaktuara nga vërshimet kuvendin e informoi edhe drejtori i Shërbimeve Publike, Mbrojtje dhe Shpëtim Faik Muçiqi, i cili tha se kjo drejtori në vazhdimësi ka në prioritet investimet që ndikojnë në ndalimin e dëmeve nga vërshimet, përfshirë zgjerimin e shtretërve të lumenjve, kanaleve të ujit, ndërtimin e urave dhe investimeve tjera për këtë qëllim

Drejtori Muçiqi tha se ekipi emergjent i komunës, por edhe kompania e kontraktuar është në teren për të intervenuar në vendet e prekura.

Për këtë çështje kanë diskutuar këshilltarët Pajtim Hodolli (PDK), Pajtim Balaj (LVV), Rafet Llapashtuca (PDK), Fatlume Jaha (LDK), Hasan Ajeti (LDK), Avni Fetahu (LVV), Avni Islami (BK), Dorentina Hasani (LVV), Vendenis Lahu (LVV), Lirika Maliqi (LVV), Bajram Ajeti (LVV) dhe Patritot Rudari (AAK).

Pas diskutimeve Kuvendi ka miratuar dy propozimet e drejtorit të DBPZHR, Vezir Januzi që: të gjitha dëmet e shkaktuara të adresohen në MBPZHR me qëllim të kompensimit të tyre dhe;  në buxhetin e Komunës për vitin 2021të planifikohet buxhet për kompensimin e dëmeve, në formë të subvencioneve.