I dyshuari për vrasjen e dy vëllezërve në Podujevë ende nuk është kapur nga policia

Policia e Kosovës ende nuk ka arritur që t’i bie në gjurmë 65-vjeçarit, i cili dyshohet se vrau dy vëllezërit nga fshati Repë i Podujevës.

Një vrasje e rëndë ndodhi në orët e para të pasdites të së shtunës në Podujevë. Dy vellezër nga fshati Repë dyshohet se u vranë nga fqinji i tyre, që e kanë përballë me shtëpi.

E arsyeja që e shtyri 65-vjeçarin që të merrte automatikun në dorë e të shtinte në drejtim të fqinjëve, dyshohet të jetë një tokë, për të cilën të dy palët pretendonin mbi pronësinë e saj.

I dyshuari menjëherë pas vrasjes, ka ikur në drejtim të maleve. Edhe pas katër ditësh, ai gjendet akoma në arrati.

Zëdhënësja e Policisë së Kosovës për Rajonin e Prishtinës, Florie Ahmeti i ka thënë Gazetës Express, se deri tani s’ka të arrestuar për këtë rast.

“Lidhur me këtë rast, që është cilësuar si Vrasje e rëndë, hetuesit policor janë duke punuar në koordinim me prokurorinë përkatëse, me qëllim të sqarimit, zbulimit të të gjitha rrethanave si dhe arrestimin e personit të dyshuar i cili ende është në arrati.

Përveç të dhënave që i kemi bërë publike deri tani nuk ka ndonjë  të dhënë të re që mund ta ndajmë me ju aktualisht, andaj kërkojmë mirëkuptimin tuaj deri në përfundimin e kësaj faze të hetimit në të cilin ndodhet rasti”, ka thënë Ahmeti.

Ndryshe, në vendin e ngjarjes, Policia ka gjetur dhe konfiskuar katër gëzhoja dhe dy vetura, derisa pas bastisjes në shtëpinë e të dyshuarit është gjetur dhe konfiskuar një armë AK-47, një pistoletë me gas dhe një pushkë gjuetie.

“Në vendin e ngjarjes kanë dalë të gjitha njësitë relevante policore ku janë gjetë dhe konfiskuar katër gëzhoja dhe dy vetura.Njësit policore kanë kryer bastisjen në shtëpinë e të dyshuarit ku janë gjetur dhe konfiskuar një armë AK-47, një pistoletë me gas dhe një pushkë gjuetie. Me vendim të prokurorit trupat e pa jetë janë dërguar për obduksion”, ka njoftuar Policia përmes raportit 24 orësh./Gazeta Express