PODUJEVË: Korniza Afatmesme Buxhetore po konsiderohet si “Dokument i asfaltit”

“Dokument i asfaltit” po konsiderohet Korniza Afatmesme Buxhetore 2021-2023 nga partitë opozitare në Podujevë. Ky dokument që i përfshin projeksionet për tre vjetët e ardhshëm të kësaj komune, sipas opozitarëve nuk parasheh zhvillim ekonomik, as në fushën e arsimit e as në shëndetësi. Bile, ata kanë thënë se ky dokument përmban edhe gabime të shumta, ku për numrin e banorëve, të nxënësve dhe të bizneseve, ndryshe shkruan në KAB e ndryshe në ueb-sajtin e Komunës. Këshilltari nga radhët e VV-së, Avni Fetahu, thotë se në kuadër të këtij dokumenti pasqyrohet Strategjia e Drejtorisë për Buxhet e Financa, ku tek deklarata e misionit të kësaj drejtorie ndër të tjera thuhet se kjo Drejtori informon lidershipin komunal me aktivitetet e ndërlidhura me buxhetin e komunës.

“Ndërsa, në bazë të të gjeturave të Auditorit të jashtëm tejkalojnë vlerën për ndërtimin e Bulevardit tanimë të famshëm të komunës ku vlera e tejkalimit ishte 70,818€. Dhe kur pyeten nga Auditori i jashtëm për këtë çështje, a e dini cila është pergjigjeja? ‘Kemi qenë konfuz!’. Uroj të mos kenë qenë të pitë (dehur v.j.)”, ka thënë Avni Fetahu. “Përmes këtij propozimi buxhetor nuk sigurohet as kushtet për zhvillimi ekonomik lokal, arsim e shëndetësi. E kam përshtypjen që edhe sorrat që sillen për Podujevë e kanë kuptuar që është buxhet i asfaltit. Por, mos harroni se ky buxhet i asfalltit edhe për një kohë të gjatë do t’i rëndojë buxhetet në vijim për shkak të intervenimeve në riparime të rrugëve. Se po të ishte shtruar njëherë si duhet e mos të ketë nevojë të intervenohet së paku 10 vite, hallal ju qoftë. Porm jeni ju dëshmitarë se çfarë cilësie përmbajnë punimet e kryera deri më tani”.

Ndërsa, Rafet Llapashtica, këshilltar nga PDK, ka thënë se në bazë të këtij dokumenti për tre vjet nuk është paraparë asnjë laborator nëpër shkolla e asnjë çerdhe të re publike. Ai ka kërkuar që të përfshihet edhe rinovimi i objektit të vjetër të administratës komunale në mënyrë që aty pos bibliotekës së qytetit, të sistemohen edhe të gjitha shoqatat.

Bashkëpartiaku i tij, Bashkim Syla, ka pasur vërejtje për shkrutimet buxhetore që do të jenë në vitet në vijim si nga granti, ashtu edhe nga të hyrat krahasuar më 2020.

Ndërsa, shefi i Grupit të këshilltarëve të VV-së, Vendenis Lahu, ka thënë se do ta përkrahnin këtë dokument sikur të merreshin parasysh propozimet e tyre. Ai ka kërkuar që në Kornizën Afatmesme Buxhetore 2021-2023 të përfshihet ndarja e 500 mijë eurove për zonën ekonomike dhe jo 80,000 sa janë planifikuar, pastaj për çdo vit të ndahen nga 500 mijë euro për subvencionimin e bizneseve prodhuese (të subvencionohen 10% e makinerive të blera me qëllim të instalimit të linjave të reja prodhuese), të ndahen 1 milion euro për renovimin e shkollave, ndërsa 200 mijë euro tjera për furnizim të shkollave me kabinete të shkencave natyrore (fizikë, kimi dhe biologji), të ketë rritje të subvencioneve në fushën e bujqësisë (subvencionet për çdo vit të jenë nga 500 mijë euro dhe të drejtohen në bujqësinë intensive dhe përmes përkrahjes edhe të biznesit prodhues në fushën e ushqimit të ndihmohet krijimi i një zinxhiri të prodhimit.

“Në fushën e shëndetësisë përveç tjerash, të ndahen mjete për investime për zhvillimin e patronazhit, të parashihen 2 milionë euro për dy vite për ndërtimin e shtëpisë se kulturës, të ndahen 300 mijë euro për renovimin dhe adaptimin e objektit aktual të komunës, të ndahen 200 mijë euro për subvencionimin e klubeve sportive, kur dihet gjendja shumë e keqe financiare e klubeve sportive, ku një pjesë e klubeve me traditë në qytetin tonë janë vetëm në një funksion formal, të ndahen 200 mijë euro për gjelbërimin e qytetit”.

Por, asnjëra nga këto nuk janë marrë parasysh në ditën kur është disktuar ky dokument. Zyrtarët komunalë kanë thënë se KAB-i parasheh investime në të gjitha fushat.