Të pakënaqur me shefin, zjarrfikësit e Podujevës në grevë

Zjarrfikësit në Komunën e Podujevës po e akuzojnë shefin e kësaj njësie, Milaim Ajvazi, për shkelje ligjore e menaxheriale në këtë institucion. Sipas tyre, Ajvazi, pos që nuk e kishte hequr nga lista e pagave një punëtor, edhe pse kishte munguar rreth tre vjet, ai ka keqpërdorur edhe veturën zyrtare. Sindikalistët nuk janë të kënaqur me vendimin e Agjencisë për Menaxhimin e Emergjencave që Ajvazit t’i shqiptojnë vetëm vërejtje me shkrim. Nëpërmjet grevës zjarrfikësit po kërkojnë shkarkimin e shefit të tyre.

“Ne i kemi disa keqpërdorime të menaxherit këtu, ka bërë disa keqpërdorime të automjetit, me derivate, keqpërdorim të shumë gjanave që i kemi specifikuar secilën veç e veç. E ato që janë pak ma shumë interesim, tek ne u kanë që marrëdhënia mes punëtorit edhe shefit nuk ka qenë mirë e koordinuar, i njëanshëm, për atë edhe janë revoltuar të gjithë zjarrfikësit, sepse një shef nuk guxon me kanë i njëanshëm për një shërbim ku për çdo ditë ka kërkesa të qytetarëve për t’iu dalë në ndihmë. E kur një shefi nuk i beson një zjarrfikës, atëherë besoj që është fundi i atij shefi për me qenë në atë pozitë”, ka thënë Ibush Salihu, kryetar i Sindikatës së Zjarrfikësve.

Shefi i Njësisë së Shërbimit të Zjarrfikësve dhe Shpëtimit, Milaim Ajvazi, nuk u është përgjigjur thirrjeve telefonike. Ndërsa zyrtarët komunalë kanë thënë se me këtë çështje është duke u marrë Agjencia për Menaxhimin e Emergjencave, raporton KOHA.

“Ne si komunë jemi të informuar që një grup i zjarrfikësve atje janë në një grevë dyorëshe, por atje është duke u kryer puna dhe është duke funksionuar ai shërbim. Ndërsa lidhur me rastin konkret është duke u marrë Agjencia për Menaxhimin e Emergjencave në kuadër të Ministrisë së Punëve të Brendshme në Prishtinë, e cila pikërisht për këtë rast Komisioni disiplinor i kësaj Agjencie ia ka shqiptuar një vërejtje me shkrim shefit të kësaj njësie”, ka thënë zëdhënësi i komunës, Naim Elezi.

Në anën tjetër, ushtruesi i detyrës së drejtorit të Departamentit të Zjarrfikësve dhe Shpëtimit në Agjencinë e Menaxhimit Emergjent, Milaim Mullabazi, në një përgjigje me shkrim ka thënë se të punësuarit në organet me interes të veçantë, ku bëjnë pjesë edhe zjarrfikësit, nuk kanë të drejtë për organizimin e grevave.

“Agjencia e Menaxhim Emergjent është në kontakt të vazhdueshëm me të gjitha njësitë profesionale të zjarrfikjes dhe Shpëtimit në nivel vendi. Sa për njoftim, më datën 30.6.2020 kemi zhvilluar takim me stafin e Njësisë në Podujevë për t’u njoftuar me problemet e shfaqura në NjPZSH. Duke u bazuar në Ligjin për greva nr. 03/ L – 200, ku përcaktohet: Të punësuarit në organet me interes të veçantë nuk kanë të drejtë në organizimin e grevës, andaj në këtë grup bëjnë pjesë edhe njësitë profesionale të zjarrfikjes dhe shpëtimit. Agjencia e Menaxhimit Emergjent bazuar në legjislacionin në fuqi ka trajtuar pakënaqësitë e shfaqura të tyre dhe ka marrë një masë fillestare ndaj komandantit të kësaj njësie. AME mbetet e përkushtuar në zgjidhjen e problemit në fjalë”, është përgjigjur ai.

Sindikalistët e Njësisë së Zjarrfikësve dhe Shpëtimit kanë thënë se nuk do ta ndalin grevën derisa të shkarkohet shefi i tyre. Ata kanë paralajmëruar edhe radikalizim të masave sindikale në rast të mospërmbushjes së kësaj kërkese.