Në Podujevë janë 24 raste aktive me COVID-19

Komunat e vendit po ankohen për numrin e ulët të testimeve që po kryhen në javët e fundit. Pavarësisht rritjes së numrit të rasteve, thonë se po vazhdojnë të testohen vetëm ata që kanë simptoma.

Më shumë testime po kërkon edhe Komuna e Podujevës. Specialistja Bedrie Rama, e cila është pjesë e Shtabit Emergjent në këtë komunë, thotë se do të duhej të bëheshin më shumë testime tash kur po ka rritje të numrit të rasteve.

Rama thotë se numri më i lartë i testimeve që janë kryer gjatë një ditë në Podujevë në këtë muaj ka qenë 35.

“Në javët e fundit ish dasht me pas më shumë testime, meqenëse edhe ka pas raste më shumë. Ne për shkak të rritjes së rasteve kemi kërkuar që testimet të kryhen në Podujevë, meqenëse në Prishtinë nuk u merrshin fort parasysh. Më së shumti testime që janë kryer gjatë një dite të këtij muaji kanë qenë 35”, tregon ajo.

Për dallim prej komunave tjera, Podujeva nuk po ka vonesa në rezultatet. Rama thotë se në shumicën e rasteve, rezultatet po i pranojnë brenda ditës.

“Në Podujevë i kemi 24 raste aktive, një prej të cilëve është në gjendje pak më të rëndë. Vonesa në rezultatet s’po kemi së fundi. Mundet më ndodh që brenda ditës po i kemi rezultatet apo më së largu të nesërmen”, ka thënë Rama.

Ndryshe, dje në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 429 mostra të marra nga Klinika Infektive dhe gjurmimi i kontakteve të rasteve në terren, prej të cilave kanë rezultuar pozitive 195.

Me rastet e mbrëmshme, numri i rasteve të konfirmuara që nga 13 marsi ka arritur në 3 mijë e 703, me gjithsej 79 raste të vdekjes të cilët kanë pasur sëmundje të tjera shoqëruese.