OPINION: Zyra e Prokurorisë së Specializuar kishte synim kthimin e Kosovës në vitin 2004

Shkruan: Behram Behluli

Pas njoftimit të Zyrës së Prokurorisë së Specializuar qëndrojnë ata që për synim kanë kthimin e Kosovës në vitin 2004, dobësimin e sajë në negociatat e ardhshme!

Njoftimi për opinion  i Zyrës së Prokurorisë  së Specializuar  ku theksohet se më 24 prill të këtij viti pran Dhomave të  Specializuara të Kosovës është deponuar aktakuzë për shqyrtim tek gjyqtari paraprak i kësaj gjykate, ndaj Hashim Thaçit, Kadri Veselit e figura tjera të rëndësishme të Ushtrisë Çlirimtare të Kosovës, kjo na ka bërë të kuptojmë se në ketë gjykatë tani ka ndikim të madh  POLITIKA!

Siç e dime, kjo gjykatë u themelua nga Kuvendi i Republikës së Kosovës, me kërkesën e shteteve të fuqishme, institucionet tona besonin se kjo gjykatë do të kryejë punën e vetë duke u bazuar në fakte, por publikimi i njoftimit për aktakuzën e pretenduar vërteton se po ndodhë e kundërta.

Dyshimin e thellon edhe me shumë koha e publikimit të këtij njoftimi, dikë e pengojë caktimi i takimit në Washington, e ky “dikushi” ndikojë tek prokurori, e ky “dikushi” padyshim se është i fuqishëm.

Duke u bazuar në njoftimin e publikuar shihet qartazi se ka pas edhe planifikim të menduar mirë, pra dikush i fuqishëm e ka planifikuar edhe publikimin e emrave të caktuar si atë të z.Kadri Veselit bashkë me atë të Hashim Thaçit. Pse nuk u publikua në njoftim emri i Hashim Thaçit me ndonjë emër tjetër i cili gjendet në aktakuzë?

Fuqia që ka ndërhyrë në këtë çështje, me gjasë ka llogaritur se me këtë veprim do të mbërrijë efektin që në Kosovë të ndodhin trazira, e trazirat e mundshme do të dëmtonin rëndë Republikën e Kosovës, imazhin e saj në botë. Për të arritur qëllimin e tyre, duhej gjithsesi të ngacmohej PDK-ja dhe Shoqatat e dala nga lufta, për këtë u deshtë të publikohej edhe emri i kryetarit të PDK-së, z.Kadri Veseli, e jo edhe i të tjerëve.

Qëllimi ishte që Kosova të dobësohej në negociatat e ardhshme, e si përfundim në fund të bisedimeve të imponohej formimi i një autonomie të gjerë për serbët e Kosovës, duke pas për bazë trazirat që do të ndodhnin, kjo do të bëhej në emër te mbrojtjes së minoritet serb. Pra dikush ka synuar që Kosovën ta kthej në vitin 2004.

Prandaj, ne, kurrsesi nuk duhet të biem pre e llogarive të huaja, nuk guxojmë me asnjë çmim të biem pre e atyre që me secilin veprim kërkojnë ta dëmtojnë vendit tone. Kjo nuk guxon të ndodhë pa marrë parasysh  çmimin e sakrificën që duhet ta bëjmë, tani por edhe në të ardhmen, secili prej nesh PA DALLIM!

Kosova është dhe duhet të jetë mbi të gjitha interesat tjera!